KIA Masat (25) Dap Dung ginra hta gumshem Myen hpyen ni laknak kaba gap shadam bun
KIA Masat (5) Dap Ba, Masat (25) Dap Dung ginra hta October shata praw 7 ya shana daw hkying 2:00pm aten, gumshem Myen hpyen ni Mali Hka maga de laknak kaba gap shadam bun ai lam chye lu ai.
Gumshem Myen hpyen dap Hk.L.Y (236) hte A.M.T (346) kaw nna, Mali Hka Sinna hkran maga de laknak kaba gap shadam bun ai lam, shawng lam na lit nga ai salang ni tsun wa ai kaw na chye lu ai.
Dai hpang A.M.T (364) kaw nna, Buga Rung lahta maga de laknak kaba 4 lang gap bun nhtawm, Da Sai dap kaw nna mung, Chyu Hkan dap hte Goi Ka Htawng lapran kaw laknak kaba 3 lang gap bun ai lam chye lu ai.
Matut nna mung, gumshem Myen hpyen dap Hk.L.Y (237) dap kaw nna, Da Sai Myo Tit mahkrai lapran kaw nga ai KIA Masat (25) ginra mayan de sinat kaba gap shadam bun ai lam nga ai.
October shata praw 6 ya shani mung, KIA Masat (5) Dap Ba, Masat (3) Dap Dung ginra, Lang Na Hka Rum makau grup-yin de, gumshem Myen hpyen ni hte Shwe Min (P.T.Ts) pawng hpawm hpyen n-gun (17) du shang wa ai majaw, KIA ni hkap shingla gasat ai lam chye lu ai.
