KIA Masat (27) Dap Dung ginra de, gumshem Myen hpyen ni hpyen n gun jat nga ai majaw, majan byin wa na hpe mungshawa ni hkrit tsang nga
KIA Masat (3) Dap Ba, Masat (27) Dap Dung ginra, Munghkawng gumshem Myen dap kaw March shata praw 6 ya shani hta hpyen n gun (100) jan du shang nga sai majaw, majan bai byin wa na hpe mungshawa ni hkrit tsang nga ai lam chye lu ai.
“Ndai Myen hpyen ni gaw, mani Man Maw hpyen dap Hk.M.Y (319 hte 601) Dap na pru wa nhtawm, Han Htet, Tung Palwi Mare hku nna dai na de hkying 3:00pm aten daram hta Munghkawng dap kaw du shang masai” nga nna hpyen shisawk salang langai tsun ai.
Ya na zawn hpyen n gun jat shang wa ai majaw, mungmare masha ni gaw majan bai byin wa na hpe hkrit tsang nga ma ai, lam salang wa matut tsun ai.
Lai wa sai February shata 17 ya hta mung, KIA Masat (27) Dap Dung ginra, Loi Jawm maga na yu wa ai gumshem Myen hpyen dap Hk.L.Y (223) dap na hpyen n gun (100) daram hte Buduzar (1) lawm ai hpyen hpung ni hpe KIA ni Dunghkung Hkyet kaw hkap gap gasat ai lam nga ai re.
Gumshem Myen hpyen ni Jinghpaw mung de hpyen n gun jat ai lam ding yang ngu na galaw nga ai majaw, KIA Masat (1) Dap Ba, Masat (2) Dap Ba, Masat (8) Dap Ba, Masat (9) Dap Ba hte Sagaing ginra ni hta gasat gala majan chyahkring hkring byin nga ai hpe mung chye lu ai.
