KIA Masat (27) Dap Dung ginra, Laika mare makau kaw gasat gala majan byin
Sinpraw Ginwang Ginjaw, KIA Masat (27) Dap Dung ginra, Laika Mare makau kaw March shata 12 ya jahpawt hkying 9:00am aten hta gumshem Myen hpyen hpung ni hpe KIA hpyen hpung ni gasat gala majan byin ai lam chye lu ai.
Gumshem Myen hpyen dap ni gaw, Dapnu (88) hte Hk.L.Y (121) Dap na pawng hpawm n gun (100) jan hpung ni re lam, lit nga ai salang langai tsun ai.
Munghkawng kaw nga ai gumshem Myen hpyen dap ni mung, gasat poi byin ai shara de sinat kaba masum lang gap bun ai lam nga ai. Ndai gumshem Myen hpyen hpung ni Munghkawng hpyen dap de yawng du shang sai lam, salang wa matut tsun ai.
Ndai gumshem Myen hpyen ni gaw, March shata praw 8 ya shani hta Maji Gung hpyen dap de lung ai ten Laika Mare htum pa kaw KIA ni hte gasat poi byin nna, hprawng bra taw ai hpyen hpung ni hpe mung chye lu ai.
Munghkawng gumshem Myen hpyen dap ni, mungmare masha ni hpe shana aten mare kata pru prang hkawm ai lam, tsep kawp n galaw na matu tsun wa ai lam ni nga ai majaw, majan laja lana byin wa na hpe mungshawa ni hkrit tsang nga ai lam ginra masha ni kaw na chye lu ai.
