KIA Masat (3) Dap Ba ginra hte Masat (9) Dap Ba ginra ni hta gasat gala majan byin
KIA Masat (3) Dap Ba, Masat (12) Dap Dung ginra hte Masat (9) Dap Ba, Masat (26) Dap Dung ginra ni hta November shata 15 ya shani gumshem Myen hpyen dap hte KIA ni gasat gala majan byin ai lam chye lu ai.
Dai hpawt hkying 4:45am aten hta gumshem Myen hpyen dap, Hk.M.Y (319, 601) dap na pawnghpawm hpyen n gun (100) daram hpung ni KIA ni nga ai Mung Leng maga de chyinglau shang wa ai majaw, KIA ni hkap gap gasat dat ai kawn gasat poi byin ai re lam chye lu ai.
Gasat poi byin ai hpang gumshem Myen hpyen ni, Mung Leng mare na mungshawa ni a dum nta hte gat seng hkan kam mara shang sawk chyinglau kau ya nhtawm, Mung Leng Ninghtawn Uphkang Rung hpe mung wan nat jahten kau da ya ai lam, shawng lam ginra shiga lawk kaw na chye lu ai.
KIA Masat (9) Dap Ba, Masat (26) Dap Dung ginra, Gwi Hka makau Lagat Madi kaw November shata 15 ya shana daw hkying 1:25pm aten hta gumshem Myen hpyen ni KIA ni nga ai maga de gale pru wa ai majaw gasat poi byin ai.
Gasat poi byin ai aten hta Gwi Hka gumshem Myen dap kaw nna, KIA ni nga ai maga de laknak kaba gap bun ai lam mung nga ai re. November shata 14 ya shana yup tung hkying 12:00non aten hta mung, gumshem Myen hpyen ni Jet nbungli hte KIA ni nga kau da ai shara kaw bawm wa jahkrat bun ai lam, shawng lam na lit nga ai salang ni kaw na chye lu ai.
