KIA Masat (3) Dap Ba, Masat (4) Dap Ba hte Masat (6) Dap Ba ginra ni hta gasat gala majan byin
KIA Masat (3) Dap Ba, Masat (27) Dap Dung ginra hta hpyen shamu shamawt hkawm nga ai, gumshem Myen hpyen dap hte KIA ni, February shata praw 9 ya jahpawt hkying 10:00am aten hta, Bangkyi Hkyet mayan kaw gasat gala majan byin ai lam chye lu ai.
February shata praw 8 ya shani hta mung, KIA Masat (27) Dap Dung ginra hta shamu shamawt chying lau hkawm ai, gumshem Myen hpyen dap, Hk.L.Y (47), Hk.L.Y (250), Hk.M.Y (319), Hk.M.Y (424) hte Hk.M.Y (601) dap na pawng hpawm hpyen n gun (120) daram hte KIA ni, Lu Leng Yang makau kaw gasat poi byin ai lam nga ai re.
Mungmyit Sinli Ga (Kachin Sub-state), KIA Masat (4) Dap Ba, Masat 8 Dap Dung ginra, Man Pying mare makau Kawng Hkam mare baw hte Namba Chyi mare baw kaw, February shata praw 9 ya jahpawt hkying 8:25am aten hta kalang, shana maga hkying 2:05pm aten hta numdaw lahkawng lang, gumshem Myen hpyen dap, Dapnu (Tatma-99) kata na hpyen hpung ni hte KIA ni gasat poi byin ai.
“Ndai gasat poi hta gumshem Myen hpyen maga marai (18) daram hkala machyi hkrum ai hpe chye lu ai, nkau hpe gaw Kutkai tsi rung de htaw shang wa ai nga na lu ai. Anhte maga gaw hpa nra ai, mungshawa ni mung hpa nra ai” nga nna shawng lam na lit nga ai Salang langai tsun ai.
Anhte ni nga ai de, Myen hpyen ni bai shani sa wa ai rai yang, gasat poi gaw naw mai byin wa na re lam, Salang wa matut tsun ai.
KIA Masat (6) Dap Ba, Masat (9) Dap Dung ginra, Nam Hpalun mare Udang Bum kaw mung, February shata praw 9 ya jahpawt hkying 10:30am aten hta gumshem Myen hpyen dap, Hk.L.Y (45) dap na hpyen hpung ni hte KIA ni gasat poi byin ai.
Ndai gasat poi hta gumshem Myen hpyen maga, si hkala nga ai majaw, gumshem Myen hpyen ni shanhte hkrai laknak kaba hte minute 20 daram hkrup mara gap shadam ai hta Hpa Hkyip mare na mungshawa Salang Hpauda Tang a nta makau kaw pala si langai wa hkrat kapaw nna, Salang Hpauda Tang asak (91) ning a shingma kaw pala hkyep hkra mat ai lam chye lu ai.
Hkala hkrum ai Salang Hpauda Tang hpe ya aten Kutkai tsi rung hta tsi tsi hkamla nga ai lam, buga masha ni kaw na chye lu ai.
