KIA Masat (36) ginra hta gumshem Myen hpyen ni hte KIA ni gasat gala majan byin
Mungmyit Sinli Ga (Kachin Sub-state), KIA Masat (6) Dap Ba, Masat (36) ginra hta shamu shamawt nga ai, gumshem Myen Hpyen ni hte KIA ni January shata praw 2 ya jahpawt hkying 10:35am aten kaw nna hkying 11:30am aten du hkra, Mungli Mare ding sa kaw gasat poi byin ai lam na chye lu ai.
“Myen Dap ni gaw, Dapnu (99) hte Dapnu (101) na pawng hpawm n-gun (100) daram re. Ndai ni bum kaw du ai lahkawng masum ya rai sai, anhte kaw na ni hkap taw nga ai kaw gale pru wa ai majaw gasat poi byin ai rai nga ai” nga nna shawng lam na lit nga ai salang langai tsun dan ai.
Myen maga na si hkala ai kade re n chye lu shi ai, anhte maga gaw hpa nra ai gasat poi gaw matut byin wa mai ai, Myen ni htingnut mat ai lam nnga shi ai, nga nna salang tsun ai.
Dai na maga hkying 3:00pm aten hta mung dai hpawt gap hkat ai shara hte gade ntsan ai shara, Bangngu mare dingsa kaw mung dai gumshem Myen hpyen ni hte sha KIA ni gasat poi matut byin ai re lam, salang wa matut tsun dan ai.
December shata 26 ya shani hta mung, KIA Masat (36) Dap Dung ginra, Maw Tawng mare makau kaw hpyen shamu shamawt lung wa ai gumshem Myen hpyen ni hpe KIA ni hkap gap gasat ai lam hpe mung chye lu ai.
