KIA Masat (4) Dap Ba hte Masat (6) Dap Ba ginra hta gasat gala majan byin
Mungmyit Sinli Ga (Kachin Sub-state), KIA Masat (4) Dap Ba, Masat (29) Dap Dung ginra hta shamu shamawt hkawm nga ai, Gumshem Myen Hpyen ni hte KIA ni, July shata praw 4 ya jahpawt hkying 8:00am aten hta Manlung Bum kaw gasat gala majan byin ai lam chye lu ai.
“Dapnu (99) kata na Myen hpyen n gun (100) daram anhte kaw na ni nga ai, Manlung Bum de htu shadut lung wa ai majaw, gasat poi byin ai re” nga nna shawng lam na lit nga ai salang langai tsun ai.
Kutkai kaw dap jung nga ai Gumshem Myen hpyen ni mung sinat laknak kaba hte gasat poi byin nga ai maga de hkrup mara gap bun nga ai lam, buga masha ni tsun ai kaw na chye lu ai.
KIA Masat (6) Dap Ba, Masat (36) ginra, Munggu Hpawng Seng, Lu Ying Htang (Miwa mare) makau kaw mung, July shata praw 4 ya shana maga hkying 5:00pm aten daram hta Kokang MNDAA hpyen hpung ni hte Gumshem Myen Hpyen Dap, Hk.M.Y (547) na hpyen hpung ni gasat poi byin ai lam, shawnglam na lit nga ai salang langai shana wa ai.
Gumshem Myen hpyen ni gaw, MNDAA hpyen hpung ni nga ai shara de shamu shamawt htu lung wa ai majaw gasat poi byin ai re lam chye lu ai.
Jinghpaw mung hte Mungmyit Sinli Ga (Kachin Sub-state) KIA ni nga ai ginra ni hta Gumshem Myen hpyen ni hpyen n gun hte laknak n gun ni htaw sa nga ding yang re majaw, Gumshem Myen hpyen ni hte KIA shani shagu ngu na gasat poi byin nga ai re.
