KIA Masat (44) Dap Dung ginra hta gasat gala majan byin
KIA Masat (9) Dap Ba, Masat (44) Dap Dung ginra hta shamu shamawt chyinglau hkawm ai, gumshem Myen hpyen dap, Dapnu (33) kata na hpyen hpung ni hpe KIA ni, November shata praw 5 ya shana daw maga hkying 1:30pm aten hta Lai Nawng Hku Pung Hkaw Taw hte Ngarem Dabang lapran kaw bawm hte hkap gap gasat ai lam chye lu ai.
Gumshem Myen hpyen dap, Hk.M.Y (11) hte Hk.M.Y (111) dap na pawng hpawm n gun 100 jan hpung ni, lai wa sai bat kaw nna shamu shamawt chyinglau hkawm ai hpyen hpung ni re lam chye lu ai.
“Anhte ni nga taw ai maga de chyinglau shang wa ai majaw, hkap gap gasat dat ai rai nga ai. Myen maga gaw marai 2 hkala nhtawm, langai si ai, anhte maga gaw hpa nra ai” nga nna lit nga ai salang langai tsun ai.
Gumshem Myen hpyen maga machyi si hkrum ai re majaw, sinat majoi gap shadam ni mung nga ai, shanhte nhtang mat ai lam nnga yang gasat poi gaw matut nna naw byin wa na re lam, salang wa tsun ai.
Dai na mung Manmaw Muklum kaw sinat kaba grai ngoi nga ai majaw, mungshawa ni hkrit tsang nga ma ai lam, ginra masha ni tsun ai kaw na chye lu ai.
