KIA Masat (5) Dap Ba, Masat (6) Dap Ba hte Masat (9) Dap Ba ginra ni hta gasast gala majan byin
KIA Masat (5) Dap Ba, Masat (3) Dap Dung ginra, Nang Zaw Hku hte Wa Shaga Bum lapran kaw July shata 16 ya shani hkying 11:10am aten hta gumshem Myen hpyen dap ni hte KIA ni gasat gala majan byin ai lam chye lu ai.
KIA ni shara la nga ai de gumshem Myen hpyen ni shamu shamawt shang wa ai majaw, KIA ni hkap shingla gasat dat ai kawn gasat poi byin ai re.
Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung ginra hta hpyen modo hte shamu shamawt hkawm ai gumshem Myen hpyenla htaw ai modo hpe July shata 16 ya shani shara 3 kaw KIA ni bawm hte hkap shingla gasat ai lam nga ai.
Hu Mung hte Hang Gai lapran hta kalang hkap adem bun ai, mi dem bun ai shara hte kade ntsan ai kaw lahkawng lang ngu na dem bun nhtawm, Nam Um mare lai kaw masum lang ngu na hkap adem bun ai, Myen hpyen dap gaw Dapnu (Tatma-99) ni re lam, shawng lam na lit nga ai salang langai tsun dan ai.
July shata 16 ya shani hta sha, KIA Masat (9) Dap Ba, Masat (26) Dap Dung ginra, Chyauk Pung mare makau kaw gumshem Myen hpyen dap, Hk.L.Y (42) dap na hpyen n gun 40 daram hpung ni shamu shamawt hkawm ai kaw KIA hpyen hpung ni hte gasat poi byin ai lam chye lu ai.
