KIA Masat (5) Dap Dung ginra hta gasat gala majan laja lana byin
KIA Masat 8 Dap Ba, Masat (5) Dap Dung ginra, Moe Tar Lay mare grup yin shara ni hta gumshem Myen hpyen dap hte KIA, PDF pawng hpawm hpyen hpung ni, January shata 20 ya shani gasat gala majan laja lana byin nga ai lam chye lu ai.
Dai gasat gala majan hta gumshem Myen hpyen dap maga na Dap Up madang, Du Kaba langai si nhtawm, hkala hkrum ai mung ram ram nga ai lam, shawng lam shiga kaw na chye lu ai. Ndai shiga hte seng nna matut sagaawn nga ding yang re.
Gumshem Myen hpyen maga de, si hkala law ai majaw, Jet Fighter nbungli 2 hte numdaw 5 lang bawm wa jahkrat bun ai sha n ga, laknak kaba ni hte mung gap bun ai lam chye lu ai.
January shata 18 ya shani hta mung, gumshem Myen hpyen dap ni hpyen shamu shamawt shang wa ai majaw, Dingdung Jawngma Dap, ABSDF hte PDF pawng hpawm hpyen hpung ni hte gasat poi byin ai lam nga ai re.
January shata 18 ya shani hta sha, Moe Tar Lay mare kaw alu poi hpawng lamang galaw nga ai nta kaw gumshem Myen hpyen dap ni nbungli bawm wa jahkrat bun ai majaw, mara kata mungshawa marai 7 asak si sum nhtawm, marai 30 daram hkala hkrum ai lam na chye lu ai.
