KIA Masat (6) Dap Ba ginra hta gasat gala majan laja lana byin
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra de, shamu shamawt htu lung wa ai gumshem Myen hpyen dap hte Pyi Tu Tsit pawng hpawm n gun 300 daram hte KIA ni, February shata 13 ya shani gasat gala majan laja lana byin ai lam chye lu ai.
“Nahpai maga na lung wa ai, Hk.M.Y (420) hte Pyi Tu Tsit pawng hpawm hpyen ni hte dai hpawt hkying 9:01am aten hta Bumchyen hte Hkalawng Bum npu kaw numdaw mi, dai na de hkying 2:03pm aten hta gaw, Kawng Yan Mare dingsa makau kaw numdaw mi, dai hpang hkying 4:00pm hte hkying 6:30pm aten du hkra gaw, Nam Um Mare baw kaw nsin sin du hkra byin ai” nga nna shawng lam na lit nga ai salang langai tsun ai.
Gumshem Myen hpyen dap gaw, Dapnu (99) hte Musau Pyi Tu Tsit ni law malawng lawm ma ai, gasat poi gaw matut nna naw byin wa mai ai, nga nna salang wa matut tsun ai.
Gasat poi hta gumshem Myen hpyen maga si hkala law ai raitim, marai kade re hpe tup hkrak n chye lu shi ai, KIA maga gaw marai langai bawm hkyep hkra ai raitim, tsang ra ai madang nre lam chye lu ai.
Namhpaka kaw dap dung ai, gumshem Myen hpyen Hk.L.Y (123) dap hte Kawng Ra Zai Bru Htu Kawng kaw nga ai ni, gasat poi byin ai shara de laknak kaba 20 jan lang gap bun ai lam chye lu ai.
KIA Masat (9) Dap Dung ginra hta February shata praw 10 ya shani kaw nna, shani shagu ngu na gumshem Myen hpyen hte KIA ni gasat gala majan byin nga ai re.
