KIA Masat (6) Dap Dung ginra hta gasat gala majan matut laja nga
KIA Masat (9) Dap Ba, Masat (6) Dap Dung ginra, Hpakant Mashi Kahtawng akyu hpyi bum mayan hta gasat gala majan matut laja nga ai lam, ginra masha ni kaw na chye lu ai.
KIA pawng hpawm hpyen hpung ni shara la nga ai, Mashi Kahtawng akyu hpyi bum maga de, February shata praw 4 ya jahpawt hkying 8:30am aten daram hta Jet nbungli hte numdaw kalang bawm wa jahkrat gasat ai hpang, gumshe Myen hpyen ni lagaw lam bai htu shadut lung wa ai majaw, laja lana gasat poi byin nga ai re.
Hkying 11:55am aten kaw nna, Y-12 nbungli hte numdaw lahkawng lang bawm bai wa jahkrat gasat nga ai rai nna, nbungli wa mat ai hte lagaw lam hku matut htu shadut lung wa ai majaw, sinat kaji kaba ngoi nga ai lam, ginra masha ni tsun ai kaw na chye lu ai.
KIA pawng hpawng hpyen hpung ni shara la nga ai, Mashi Kahtawng akyu hpyi bum maga de, gumshem Myen hpyen dap ni January shata 31 ya shani kaw nna, lagaw lam hku htu shadut gasat wa ai majaw gasat gala majan byin wa ai re.
Hpakant Dapnu kawng kaw nna mung laknak kaba, drone ni hte hkrup mara gap shadam ai majaw, mungshawa ni asak si sum ai sha n-ga, dum nta ni htenza nga ai hpe chye lu ai.
Ya aten hta Hpakant hpyen man, Waimaw hpyen man hte Manmaw hpyen man shara ni de, shani shagu ngu na KIA pawng hpawm hpyen hpung ni hte gumshem Myen hpyen dap ni gasat gala majan laja nga ai hpe mung chye lu ai.
