KIA Masat 6 Dap Dung ginra hta gumshem Myen hpyen hte KIA ni gasat gala majan matut byin
KIA Masast 9 Dap Ba, Masat 6 Dap Dung ginra, Kawng San kaw May shata 27 ya jahpawt hkying 5:00am jan aten hta gumshem Myen hpyen n gun 100 jan hpyen hpung ni hpe KIA ni bawm hte hkap shingla gasat ai lam chye lu ai.
Gumshem Myen hpyen dap Hk.M.Y 111, Hk.M.Y 116 hte Hk.M.Y 13 dap na pawng hpawm hpyen n gun 100 jan shamu shamawt hkawm ai kaw KIA ni hkap gap gasat ai re lam chye lu ai.
KIA ni hkap gap gasat dat ai hpang gumshem Myen hpyen ni, makau grup yin shara ni de sinat kaji kaba hkrup mara gap shadam bun ai lam ni mung nga ai lam, ginra masha ni tsun ai kaw na chye lu ai.
Hpakant KIA Masat 9 Dap Ba, Masat 6 Dap Dung ginra hta May shata 20 ya shani kaw nna, gumshem Myen hpyen dap ni shamu shamawt chyinglau hkawm wa ai majaw gasat gala majan byin wa ai lam, ginra shi sawk ni kaw na chye lu ai.
Mungmyit Sinli Ga (Kachin Sub-state), KIA Masat 6 Dap Ba, Masat 36 Dap Dung ginra ni hta mung, gumshem Myen hpyen ni ding yang ngu na shamu shamawt chyinglau hkawm nga ai majaw, KIA ni nga ai shara de ni kahtep wa jang gasat gala majan gaw, aten nmasat ai byin wa mai ai lam, shawng lam na lit nga ai salang ni tsun ai kaw na chye lu ai.
