KIA Masat (6) Dap Dung ginra hta nbungli bawm wa jahkrat bun

KIA Masat (9) Dap Ba, Masat (6) Dap Dung Hpakant ginra hta March shata 10 ya jahpawt maga hkying 12:30pm aten daram hta, gumshem Myen hpyen ni nbungli bawm wa jahkrat bun ai re lam chye lu ai.

Nbungli lahkawng hte Mandalay Tanda Oo nbungli daru kawn rawt lung wa ai rai nhtawm, bawm mali lang wa jahkrat bun kau da ai re lam chye lu ai.

Ya na zawn bawm wa jahkrat bun ai hta masha si hkala hkrum ai lam nnga ai hte, Masat (6) Dap Dung hta bawm wa jahkrat kau da ai hpang, Masat (9) Dap Ba ntsa kaw nbungli wa pyen gawoi kau da ai re lam chye lu ai.

Lai wa sai 2022 ning October shata 23 ya shana hta, gunshem Myen hpyen dap kaw nna, Anang Pa kaw bawm wa jahkrat bun ai majaw, mung mare masha ni si hkala hkrum ai lam byin lai wa sai majaw, mung mare masha ni hkrit tsang nga ai re.

Matut nna gumshem Myen hpyen dap ni Hpakant ginra hta mungshawa ni hpe rim jep joi ai lam ni galaw nga ai rai nna, Myitkyina, Tang Hpre mare hta mung, KBC nawku jawng wang hta gumshem Myen hpyen dap ni masha n-gun 200 daram shara jahkrat nga let, hpyen shamu shamawt nga ai re lam chye lu ai.