KIA Masat (6) Dap Dung ginra, Mazup Yang mare makau kaw gasat poi byin

KIA Masat (9) Dap Ba, Masat (6) Dap Dung ginra, Hpakant Lawnghkang Mazup Yang mare makau kaw February shata 24 ya jahpawt hkying 8:30am aten hta gumshem Myen hpyen ni hte KIA ni gasat poi byin ai lam chye lu ai.

Gasat poi byin ai hte Mazup Yang Htawng kaw sin ai gumshem Myen hpyen dap ni laknak kaba hkrup mara gap dat ai majaw, Mazup Yang mare kaw wa hkrat kapaw nna, Jan Lahkri Ja Awn laknak kaba si hkyep hkra hkala sawng ai sha n-ga dum nta lahkawng mung hten mat ai lam, ginra masha ni kaw na chye lu ai.

Hkala hkrum ai Jan Lahkri Ja Awn gaw, kasha lahkawng a kanu rai nna, ya ten Lawnghkang tsi rung kaw tsi tsi hkam la nga ai lam chye lu ai.

Lai wa sai aten hkan mung, Mazup Yang Htawng kaw sin ai gumshem Myen hpyen dap ni makau grup yin shara ni de, laknak kaba hkrup mara gap shadam bun ai majaw, mungshawa ni hta hkra hkala si sum mat ai lam ni mung byin lai sai re.