KIA Masat (9) Dap Ba kata gasat gala majan matut byin

KIA Masat (9) Dap Ba, Hpakant lam Deng-6 Kyauk Hpya grup yin kaw KIA hte gumshem Myen hpyen dap ni gasat gala majan matut byin nga ai lam chye lu ai.

February shata 11 ya jahpawt hkying 4:00am aten daram kaw na, Le Pyin bawm yam dap kawn Nam Tin, Nam Ya maga le wa ai gumshem Myen hpyen dap n-gun 80 daram lawm ai hpung ni hte KIA pawng hpawm hpung ni hkying 7:00am aten daram kaw na gasat gala majan byin nga ai re lam, lit nga ai salang langai tsun ai.

Hpakant lam Deng-6 hta February 11 ya shani kaw na gasat gala majan byin nga ai rai nna, February shata 12 ya jahpawt hkying 7:00am aten daram kaw na numdaw kalang bai gasat gala majan matut byin nga ai re lam chye lu ai.

Gasat gala majan byin nga ai ten, Hpakant tatma kawng hte Gin Si byuha kawng kaw na laknak kaba gap garum ya ai hte Myitkyina kaw na rawt lung wa ai Jet nbungli (2) hte bawm wa jahkrat bun kau da ai lam nga ai hte ya aten lahkawng maga na hpyen masa gara hku naw rai nga ai hpe matut sagawn nga ding yang re.