KIA Masat (9) Dap Dung ginra hta gumshem Myen hpyen hpung ni hte KIA ni numdaw (3) lang gasat gala majan byin
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra, Namhpalun pa baw Gala Kawng mayan kaw May shata 15 ya shani gumshem Myen hpyen hpung ni hte KIA hpyen hpung ni numdaw (3) lang gasat gala majan byin ai lam, ginra shiga lawk kaw na chye lu ai.
“Dai ni hkying 11:39am aten hta kalang, hkying 12:15pm aten hta numdaw lahkawng lang bai na hkying 1:00pm aten hta numdaw masum lang gasat poi byin ai re” nga nna buga na salang langai tsun ai.
Gumshem Myen Hpyen Dap ni gaw, Dapnu (Tatma) 44,66,77 hte 99 ni rai nna, hpyen n gun 300 daram re. Gasat gala majan gaw matut nna naw byin wa mai ai lam, salang wa tsun ai.
May shata 14 ya mani hkying 11:30am aten hta Namgut mare baw tsi rung wang kaw mung gumshem Myen hpyen ni hte KIA ni numdaw mi gasat poi byin ai lam chye lu ai.
May shata 14 ya shani hta sha, KIA Masat (1) Dap Ba, Masat (22) Dap Dung ginra, Tsum Hka lahta kaw gumshem Myen hpyen ni hte KIA ni gasat gala majan byin ai lam, shawng lam shi sawk ni kaw na chye lu ai.
