KIA Masat (9) Dap Dung ginra hta laja lana gasat gala majan matut byin
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra de htu shadut chyinglau shang wa ai, gumshem Myen hpyen ni hte KIA ni, February shata 15 ya jahpawt hkying 8:29am aten kaw nna, laja lana gasat gala majan matut byin nga ai lam chye lu ai.
“dai hpawt hkying 8:39am aten kaw na hkying 9:58am aten du hkra, Hka Hpaw mare dingsa makau kaw numdaw mi gasat poi byin ai. Hkying 10:28am aten kawn hkying 12:30pm aten du hkra numdaw 2 lang, hkying 3:01pm aten kaw na hkying 6:21pm aten du hkra numdaw 3 lang laja lana gasat poi byin ai” nga nna shawng lam na lit nga ai salang langai shana wa ai.
Gap hkat ai loi hkring nga yang, Jet Fighter (2) hte hkying 1:38pm aten hta numdaw kalang, hkying 1:50pm aten hta numdaw 2 lang, hkying 4:21pm aten kawn hkying 4:33pm aten numdaw 3 lang, Kayun Kawng hte Kawngsak Bum kaw jak sinat hte shawng gap nna, bawm bai jahkrat bun ai, majan gaw naw byin wa na re shada naw sin hkat taw nga ai, Myen hpyen maga gaw, si hkala law ai nga na lu ai, anhte maga gaw hpa nra ai, nga nna salang wa matut tsun ai.
Gasat poi byin nga ai shara de, Namhpaka kaw dap jung ai, gumshem Myen hpyen dap Hk.L.Y (123) dap kaw nna, laknak kaba hte 9 lang gap bun ai lam chye lu ai.
KIA Masat (6) Dap Ba, Masat (9) Dap Dung ginra hta February shata 10 ya shani kaw nna, gumshem Myen hpyen ni htu shadut chyinglau lung ai majaw, shani shagu ngu na gasat poi byin nga ai re.
February shata 13 ya shani hta mung, KIA Masat (5) Dap Ba ginra, Bum Tawng Machyang maga kaw na yu wa ai, gumshem Myen hpyen hpung hpe KIA ni hkap gap dat ai kawn gasat poi byin ai lam, shawng lam shisawk ni shana wa ai kaw na chye lu ai.
