KIA Masat (9) hte Masat (36) Dap Dung ginra hta KIA, MNDAA ni hte Gumshem Myen hpyen dap ni gasat poi matut byin
Mungmyit Sinli Ga, (Kachin Sub-state) KIA Masat (6) Dap Ba, Masat (9) hte Masat (36) Dap Dung ginra ni hta, shamu shamawt hkawm nga ai Gumshem Myen hpyen dap ni hte KIA, Kokang MNDAA hpyen hpung ni August shata 15 ya shani gasat poi byin ai lam chye lu ai.
Kutkai kawn hpyen Modo (17) hte hpyen shamu shamawt pru wa ai Gumshem Myen hpyen hpung ni hpe daihpawt hkying 2:00am aten daram hta KIA Dap Dung (9) hpyen hpung ni bawm hte hkap gap gasat ai kawn gasat poi byin ai lam chye lu ai.
Shana maga hkying 3:5pm aten kaw nna 3:45pm aten laman hta mung, KIA Masat (36) Dap Dung ginra, Na Het Pa kaw Kokang MNDAA ni hte Gumshem Myen dap Hk.M.Y (518) dap ni gasat poi byin ai.
Gumshem Myen hpyen n-gun (160) daram hpung ni gaw hpyen shamu shamawt htu shadut hkawm ai majaw, MNDAA hpyen hpung ni hte gasat poi byin ai re lam, shawng lam na lit nga salang langai tsun ai.
Mungmyit Sinli Ga ginra hta Gumshem Myen hpyen dap kaw nna hpyen shamu shamawt ai lam dingyang galaw nga ai majaw, KIA, MNDAA hpyen hpung ni hte Gumshem Myen hpyen dap ni gasat poi matut byin wa mai ai lam chye lu ai.
