KIA pawng hpawm hpyen hpung ni, gumshem Myen hpyen dap shara (2) hpe matut gasat zingla lu
Sinpraw Ginwang Ginjaw, KIA Masat (3) Dap Ba ginra hta April shata praw 2 hte hpraw 3 ya shani hta gumshem Myen hpyen dap shara (2) hpe KIA pawng hpawm hpyen hpung ni matut gasat zingla lu ai lam chye lu ai.
Gasat zingla lu ai shara gaw, Hka Wan Bang, Chauk Tsahkan Udang kawng hpyen dap hpe April shata praw 2 ya shana maga hkying 6:45pm aten hta padang dip zingla lu sai rai nna, April shata praw 3 ya jahpawt hkying 9:30am aten hta, Nmawk mare makau Dagaw mare ntsa na, Maisak Kawng gumshem Myen hpyen dap hpe padang dip gasat zingla lu sai re lam, shawng lam na lit nga salang ni kaw na chye lu ai.
Gasat poi byin ai shara de, Nmawk kaw dap jung nga ai Hk.M.Y (437) gumshem Myen hpyen dap kaw nna, laknak kaba hte gap sharu bun ai sha n-ga, hpyen gasat nbung li kaw nna bawm jahkrat bun ai raitim, KIA pawng hpawm hpyen hpung ni hpyen dap hpe padang dip gasat la lu nga ai re.
April shata praw 3 ya shana hkying 8:15pm aten hta Manje Mandalay modo lam mayan hta dap jung nga ai, Han Htet gumshem Myen hpyen dap hpe KIA pawng hpawm hpyen hpung ni sa htim gap gasat dat ai hpang, Manje makau kaw dap jung nga ai, Hk.M.Y (319) gumshem Myen hpyen dap ni, Han Htet maga de laknak kaba gap bun nga ai lam, ginra masha ni tsun ai.
KIA Masat (3) Dap Ba ginra hta March shata 27 ya shani kaw nna, Loi Je hte Nmawk modo lam mayan hta dap jung shara jahkrat nga ai gumshem Myen hpyen dap hpe KIA pawng hpawm hpyen hpung ni Myen hpyen dap (10) jan hpe padang dip gasat zing la lu ai hta Yaw Yung Byuha dap kaba hte Sinlum Bum Byuha dap kaba (2) lawm ai re.
KIA pawng hpawm hpyen hpung ni gaw, gumshem Myen hpyen dap hpe langai hpang langai gasat zingla mat wa ai majaw, gumshem Myen hpyen dap ni gaw, gasat poi byin ai lam nnga, mungshawa ni nga ai shara de masing nga nga hte hkrup mara, nbungli bawm ni jahkrat bun nga ai hpe mung chye lu ai.
KIA Masat (1) Dap Ba, Sumpra Bum kaw dap jung nga ai, gumshem Myen hpyen dap hte KIA Masat 8 Dap Ba, Sinbo kaw dap jung nga ai gumshem Myen hpyen dap hpe mung, KIA pawng hpawm hpyen hpung ni htim gasat nga ding yang re lam na chye lu ai.
၎
င
၎
၎
