Dingdung daw dap hpawm ni hte Myen Hpyen Dap ni gasat poi byin
Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung, Kutkai Ginwang, Ja Bum Ginwang Daw, Dima makau Nawng Chu Bum kaw February shata 20 ya shana daw 2:20Pm aten kaw nna 3:30pm aten du hkra dingdung daw dap hpawm ni rai nga ai KIA, SSPP, MNDAA pawnghpawm hpyen hpung ni hte Myen Hpyen Dap, Dapnu (99) kata na hpyen hpung ni gasat poi byin ai lam na chye lu ai.
Myen Hpyen hpung, hpyen n-gun (200) daram gaw wuhpung lahkawng garan nhtawm, hpyen man 2 hku nna KIA hpyen hpung ni dap jung shara la nga ai Nawng Chu Bum de htu shadut lung wa ai majaw gasat poi byin ai re lam, Masat (9) Dap Dung na salang langai tsun ai.
Myen Hpyen Hpung ni gaw shana maga 3:30pm aten daram kaw nna bai htingnut mat ai raitim, ya aten ni kahtep ai hku nna naw shamu shamawt nga ai lam, matut nna hpyen n-gun naw jat wa na masa nga ai majaw, gasat poi ni matut byin wa mai ai lam, salang wa matut tsun ai.
Gasat poi byin ai hta, KIA, MNDAA hte SSPP hpyen hpung ni gaw wuhpung 3 hku nna Myen hpyen hpung ni hpe jawm ninghkap gasat ai majaw, Myen hpyen hpung maga hkala nba sum machyi ai lam nga ai re.
“Myen Hpyen Dap Asuya ni laja lana bai htu shadut lung wa ai raiyang, anhte mung laja lana rai nna ninghkap gasat na re. Anhte gaw ntsang ra ai. Ninghkap majan ni gaw grai naw law wa na masa nga ai” nga nna salang wa matut tsun ai.
Gasat poi byin ai shara gaw, mare hte ni kahtep ai re sha n-ga, Myen Hpyen Dap ni gaw Dima Pyi Tu Tsit Dap ntsa kaw nna laknak kaba gap bun ai majaw, Dap npu hkan na mungshawa htinggaw 5 daram gaw mare ka-ang de gan sit mat ai lam nga ai re.
Laiwa sai February shata 11 ya shani hta mung, KIA Masat (6) Dap Ba, Masat (38) Dap Dung ginra hte Masat (9) Dap Dung, Dap Kung (3) ginra ni de Myen Hpyen Dap ni htu shadut htim gasat lung wa ai majaw KIA hpyen hpung ni hte gasat poi byin ai lam na chye lu ai.
Photo Credit; Fb
