KIA shagit hpe gumshem Myen hpyen dap ni htim gasat
KIA Masat (9) Dap Ba, Masat (44) Dap Dung ginra KIA shagit shara hpe gumshem Myen hpyen dap ni htim gasat ai lam chye lu ai.
December shata 12 ya shana daw hkying 6:00pm aten daram hta KIA ni shara la nga ai, Ka Maing Deng 8 shagit hpe gumshem Myen hpyen dap hte Sam hkyeng P.T.Ts pawng hpawm hpyen hpung ni htim gasat wa ai majaw, gasat gala majan byin wa ai re lam, lit nga ai salang ni kaw na chye lu ai.
Gumshem Myen hpyen dap hte Sam hkyen P.T.Ts pawng hpawm n-gun, 300 daram hte htu shadut htim gasat wa ai majaw, lahkawng maga gasat gala majan byin wa ai hta ya aten hpyen masa gara hku naw rai nga ai hpe matut sagawn nga ai.
Matut nna Waimaw ginra hta mung, gumshem Myen hpyen dap ni hpyen n-gun htu shadut nna, hpyen shamu shamawt ai lam ni galaw nga ai hpe chye lu ai.
KIA pawng hpawm hpyen hpung ni Manmaw hte Manje ginra hpe laja lana htim gasat nga ai aten, gumshem Myen hpyen dap kaw nna mung, Ka Maing ginra hta ndai zawn bai htu shadut htim gasat wa ai lam nga ai hpe chye lu ai.
