KIO asuya jawng na tsang ( 10 ) jawngma ni a Awng, Sum, Result hpe du na May praw 6 ya shani ndau na hkyen
Wunpawng Mungdan Shanglawt Asuya lahta tsang jawng tsang ( 10 ) san poi htai da ai jawngma ni a Awng, Sum, mahtai hpe, du na May praw 6 ya shani ndau na re lam,
Ginjaw Hpaji Dap kawn chye lu ai.
Tsang ( 10 ) hpe htai da ai jawngma ni a awng sum result hpe May praw 6, bat hpang 6 ya jahpawt hkying 6:00am aten kaw nna, seng ang ai hpaji rung hte lahta tsang jawng shara shagu de, shana shabra ai lam hpe galaw na re. Bai nna, Laiza FM kaw na mung ndau shana ya mat wa na re lam, KIO asuya jawng hta lung ai jawngma mying jahpan hpe May 25 ya shani kaw nna, bai hkap la hpang sai lam, Ginjaw Hpaji Dap Ningtau Lithkam Hpaji Du Lahpai Gam Maw tsun ai kawn chye lu ai.
KIO asuya hpaw tawn ai lahta tsang jawng ni gaw, Laiza lahta tsang jaw, Alen Bum hpyen yen lahta tsang jaw, Mai Ja Yang lahta tsang jawng, Mai Ja Yang Htoi Ningshawng lahta tsang jaw, Mungmyit Sinli lahta tsang jawng, Nba Pa lahta tsang jawng, Danai Awng Lawt lahta tsang jawng, N-gum La lahta tsang jawng ni re hpe chye lu ai.
2016-2017 hpaji ladaw tsang ( 10 ) hpe htai da ai jawngma yawng marai ( 840 ) tup re hpe mung chye lu ai.
