KIO Asuya uphkang ginra na lahta tsang hpaji jawng tsang (10) san poi san jep ngut
KIO Asuya uphkang ginra kata na 2020-2021 ning hpaji ladaw, lahta tsang hpaji jawng tsang (10) san poi hpe April shata 19 ya shani angwi apyaw san jep ngut la lu sai lam chye lu ai.
KIO uphkang ginra kata Lahta Tsang Hpaji Jawng yawng (7) nga ai rai nna, san poi san jep ginra hpe shara (6) masat nhtawm tsang (10) san poi san jep ai lam galaw ai re hpe chye lu ai.
San poi san jep ai ginra ni gaw Laiza Lahta Tsang Jawng, Alen Bum Lahta Tsang Jawng, Mai Ja Yang Lahta Tsang Jawng, N-gum La Lahta Tsang Jawng, Mungmyit Sinli Lahta Tsang Jawng hte Nba Pa Lahta Tsang Jawng ni rai nna, daining tsang (10) san poi htai ai jawngma jahpan yawng marai 831 tup re hte tsang (10) sharin sara/num ni yawng marai 73 re lam chye lu ai.
Mung masa shuk shanut taw ai aten re majaw, Myen Mung Asuya jawng nlu lung ai jawngma ni a matu mung, KIO uphkang ginra kata hpaw tawn ai gara jawng ni hta rai tim, jawng ginra n garan ginghka ai sha, tarawng tara hte hkrak shang ging ai tsang gawk kaw sharin hkam la lu na matu ahkaw ahkang hpaw da ya ai re lam, Ginjaw Tsang (10) San Poi San Jep Hpung Salang, Sara Kaba Use Zawng Lum tsun ai.
KIO Asuya uphkang ginra kata na lahta tsang hpaji jawng tsang (10) san poi san jep ai hpe April shata 12 ya shani kaw nna April 19 ya laman angwi apyaw galaw la lu sai rai nna, tsang (10) awng/sum mahtai hpe May shata 20-25 lapran ndau shana ya na re lam chye lu ai.
