KIO Ginjaw Covid-19 Ana Zinli Makawp Ninghkap Komiti Salang ni hte Jinghpaw Mungdaw Asuya Covid-19 Ana Makawp Maga Komiti ni hkrumzup hpawng galaw
KIO Tingnyang Up Malai (II) Sara Kaba Sumlut Gam woi awn ai Ginjaw Covid-19 Ana Zinli Makawp Ninghkap Komiti Salang ni, Jinghpaw Mungdaw Asuya Shinggyim Lam Hkringmang Salang U Nay Win woi awn ai Salang ni hte WMR woi awn ai Covid-19 Concern And Respornse Commitee Kachin ni May shata 13 ya shani KIO uphkang ginra Mai Sak Pa Quarantine Dabang kaw Covid-19 ana zinli makawp ning hkap ai lam hpe rau ta gindun galaw sa wa na lam ni hpe hkrumzup bawngban ai lam galaw ai re.
Bawngban hpawng hta wuhpung shagu galaw nga ai magam bunli ni hpe tang madun ai lam, Mungdaw kata Covid-19 ana kap hkrum ai masha nga wa yang gara hku tsi gawn lajang galaw sa wa na lam ni hpe bawng ban ai, KIO Ginjaw Covid-19 Ana Zinli Makawp Ninghkap Komiti Salang ni kaw nna Jinghpaw Mungdaw Asuya Covid-19 Komiti ni, Covid-19 Concern And Respornse Commitee Kachin (CCRC-K) ni hte ta gindun let Covid-19 ana zinli makawp ninghkap magam bungli ni hpe galaw sa wa na matu myit hkrum da ai lam ni mung nga sai re.
Hpawng hta Wunpawng Mungdan Shanglawt Kongsi (KIC) Ningbaw Malai Lat Du Daju Jum Sumlut Gun Maw kaw nna mung, Covid-19 ana zinli makawp maga lam hta Mungdaw Asuya kawn garum jaw mai ai lam ni hpe garum jaw ya na matu, magam bungli ni a n tsa ta gindun sa wa ai lam hta mung mungshawa ni kam hpa ging hkra magam bungli hpe galaw sa wa yang shawng lam hta akyu rawng wa na re nga nna tsun hpaji jaw ai.
Jinghpaw Mungdaw Shinggyim lam Hkringmang Salang U Nay Win kaw nna mung, Covid-19 ana makawp ninghkap magam bungli ta gindun galaw sa wa ai lam hta awng dang ai rai yang, simsa lam bawngban ai lam hta mung awng dang wa lu na re nga nna mu mada lam hpe tsun dan ai.
Bawngban hpawng hta KIO hte Jinghpaw Mungdaw Asuya ni Covid-19 ana zinli makawp maga lam hte seng ai magam bungli ni hta rau ta gindun sa wa na lam, KIO uphkang ginra hta mung ana zinli makawp ninghkap lam hte seng ai wunkat ni hpe jaw ya na ngu ai lawng lam 5 hpe myit hkrum da sai re.
Hkrumzup hpawng hta Sara Kaba Sumlut Gam woi awn ai KIO Ginjaw Covid-19 Ana Zinli Makawp Ninghkap Komiti Salang ni, Covid-19 Concern And Respornse Commitee Kachin (CCRCK) ni, Mungdaw Asuya Shinggyim Lam hkringmang Salang U Nay Win, Jinghpaw Mungdaw Hkamja Lam Matsun Du Dr. Aye Thein, Makam Masham Nawku Hpung de na hpung woi Sara Kaba ni yawng marai 40 jan sa du shang lawm bawngban ai re lam chye lu ai.
