KIO ginjaw ginra kata hta jawng tsang 6 kawn, tsang 10 lapran na jawngma ni hpe ninggawn mungmasa hte laksan machye machyang jaw hpawng galaw
KIO pati shamu shamawt komiti kaw nna woi awn nhtawm, Laiza lahta tsang jawng Lawt Ninghkawng Gawknu hta tsang 6 kaw nna tsang 10 lapran na jawngma ni hpe June shata 13-14 lahkawng ya tup ninggawn mungmasa hte laksan machye machyawng jaw hpawng hpe galaw ai lam chye lu ai.
Ninggawn mungmasa hpe sharin ya ai sharin sara ni gaw, Salang Kaba Labya Tang Gun ( Mungchying Uphkang Dap Lithkam ), Lat Du Up Jum Labawng Gam Rip ( Div. Amu Madu ) hte Du Up Ura Naw Tawng ni re. Laksan machye machyang jaw ya na sara ni gaw, Sara Kaba Sumlut Gam ( KIO Tingnyang Up Malai ll ), Du Up Jum Nbang Bum Sinwa Naw hte Du Up Daju Maran Zau Tawng ni rai nna, yu ngwi mahkawn sharin ai lam hpe gaw Du Up Yajawng Dai Hkawng hte Du Up Hpung Share ni sharin ya ai.
“Daini na jawngma ni ramma shayi shadang sha ni gaw tinang a kanu kawa a shingwun kata kaw sha nga nna hpa nchye ai, shanglawt lu ra sai hpyenla la ra sai, magam gun ra sai ngu tsun yu yang nkam galaw ai mahtai ni law law pru wa ai. Myutsaw mungtsaw myit banbang ai n gun yawm wa ai hpe ntsa tsang Ginjaw Komiti Salang ni mu mada ai majaw, ndai masing hpe woi jahkrat wa ai re” nga nna Ninggawn Daju Pati Komiti Amu Madu Du Up Yajawng Dai Hkawng tsun ai.
Ndai lamang hpe Laiza Lahta Tsang Jawng, Je Yang KBC Gawknu hte Alen Bum Lahta Tsang jawng shara 3 kaw galaw ai, sharin hkamla ai jawngma yawng 1844 tup re. Ndai lang gaw shawng ningnan lang rai nna matut galaw sa wa na masing nga ai lam chye lu ai.
