KIO hpung shang masha majing ( PF ) n’nan ni hpe ga shaka ( Oath ) jaw hpawng galaw
Laiza Muklum Padang Rung Gawknu hta November shata 21 ya shani hkying 10:00am aten kaw nna hkying 11:20am aten laman Ginjaw Rung Pati Komiti kata na KIO hpung shang masha majing PF n’nan marai 17 hpe ga shaka ( Oath ) jaw ai hpawng lamang galaw ai lam chye lu ai.
Hpung shang masha majing PF nnan ni hpe, Salang Maran Hkun Seng ( Ginjaw Rung Pati Komiti Shingtau Tingnyang Up ) kaw nna, ga shaka jaw ya ai lam galaw ai.
Ga shaka hkam la sai KIO hpung shang masha ningnan ni hte hpawng hta du sa ai magam gun masha ni hpe Salang Lahpai Hing Wawm ( Ninggawn Daju Pati Komiti Shingtau Tingnyang Up II ) kaw nna hpaji jaw shatsam mungga shaga ai hta “Wunpawng Mungdang Shanglawt Hpung masha ni gaw, tinang gaw ( Organizar ) gahkyin gumdin ai hpa-awn ( leader ) rai ra ai. Langai hkrai hku nna mung, wuhpung hku nna mung, yawng hpe amyusha ni grau nna rawt jat galu kaba myit hkrum kahkyin gumdin ai lam ni nga na matu gaw, kahkyin gumdin ai bungli galaw ra ai. Masat da ai tara ni hpe hkansa shatup ra ai, madat mara ra ai, magam bungli hpe rawt jat hkra galaw sa wa ra ai” nga nna shatsam mungga tsun ai.
Salang Ura Naw Tawng ( Ginjaw Pati Komiti Tingnyang Up ) hku nna mung, hpawng hpungdim dat mungga shaga nna hpawng hpe shangut shakre la lu ai lam chye lu ai.
