KIO pati hpung shang salang majing PF nnan ni hpe ga shaga “Oath” jaw ai hpawng galaw
KIO ginjaw rung pati komiti kaw nna woi awn let, KIO pati hpung shang salang majing (PF) ningnan ni a ga shaka hkam la hpawng hpe October shata 23 ya jahpawt hkying 9:00am aten kaw nna hkying 10:10am aten laman Laiza Muklum Padang Rung Gawknu kaw galaw ai lam chye lu ai.
Salang Maran Hkun Seng (Ginjaw Rung Pati Komiti Shingtau Tingnyang Up) kaw nna KIO pati hpung shang salang majing PF ningnan ni hpe ga shaka (Oath) jaw ai lam galaw ai.
Ga shaka Oath hkamla ngut sai Wunpawng Mungdan Shanglawt Hpung shang Salang majing PF ningnan ni hpe Salang Ura Naw Tawng (Ginjaw Rung Pati Komiti Tingnyang Up) kaw nna shatsam mungga tsun ai.
“Ga shaga Oath la ai lam gaw magam bungli hpe grau nna, galaw shakut shaja sa wa na matu re. Bungli lit kaba hpe gunhpai la ai lam rai sai, Wunpawng amyusha hte KIO hpung a ntsa kaw kaja wa myit mu myit hkut ai lam rawng nhtawm anhte a pandung shadaw de woi sa wa na, ga shaka Oath hkam la sai hpang gaw Mungdan a ntsa, Hpung a ntsa, amyusha a ntsa kaw kaja wa nan myit da kring da lang tsap lu ai ni rai ra sai re. KIO a magam bungli lit hpe lit garan la ai lam rai sai, tinang dep hkap ai hku nna gunhpai sa wa na matu anhte gaw madu tai ai lam, kri ngau tai ai lam, ngang kang ai myit jasat anhte hta rawng ai lam hpe ga shaka la ai lam re. Ga shaka la ai a npawt nhpang gaw amyusha a ntsa, Mungdan a ntsa kaw kaja wa ngai prat tup Shanglawt nlu dingsa shakut shaja sa wa na nngai ngu ai lachyum re” nga nna shatsam mungga tsun ai.
Dai ni ga shaka Oath hkam la sai KIO hpung shang Salang majing PF ningnan marai 6 hte Ginjaw Rung Pati Komiti rung shagu na magam gun ni yawng marai 43 tup sa du shang lawm ai lam chye lu ai.
