KIO uphkang ginra a laksan tsang 10 san poi awng jahpan shale
KIO uphkang ginra kata nga ai lahta tsang jawng ni hta laksan tsang 10 san poi htai ai, awng jahpan hpe December shata 11 ya shani shale sai re.
Ndai san poi hpe lai wa sai November shata praw 6 ya shani kaw na 13 ya laman htai sa wa ai tsang 10 awng jahpan re lam, Ginjaw Hpaji Dap Amu Madu Sara Kaba Marip Naw Htoi tsun ai.
“2022, 2023 hpaji ladaw kaw htai ai shaloi hkrat mat ai jawngma ni hpe madung mahta na bai woi htai ai lam re, 2011 kaw na 2023 ning hpaji ladaw laman hkrat mat ai, magam gun ni mung law law nga ai, ramma nkau ni gaw hkrat mat na kaga de gaw nlu sa, asak gaw kaba wa re ni mung lawm ai, dai majaw ndai magam gun ni hte ramma ni hpe shinggan hku htai na ahkang jaw da na htai shangun ai lam re” nga nna tsun ai.
Anhte myu sha ni tinang a amyu sha tinang a htunghking, tinang a makam masham wuhpung wuhpawng hte htap htuk ai sharin matsun sharin malawm ni hpe gin shalat taw nga sai, ndai hpe 2025 hpaji ladaw kaw na gaw tsang 10, 11, 12 ngu ai madang de sharin ai ladat ni mung jashai wa sana re majaw, ya na zawn laksan bai htai shangun ai lam re nga nna Sara Kaba matut tsun ai.
Laksan san poi htai ai hta Laiza, Mai Ja Yang, Alen Bum, Mungmyit Sinli, Nba Pa, Lawt Awng, Lawt Awng (2) (hkridun jawng), Chying Htawng Pa, Uru Div hte Ngum La lahta tsang jawng ni hta htai ai re lam chye lu ai.
San poi htai ai jawngma yawng marai 839 rai nna, awng ai jawngma yawng marai 591 re hte ndai kalang htai ai hta hkrat mat ai jawngma ni 2023, 2024 hpaji ladaw a jahtum san poi rai nga ai, March shata hta bai matut htai mai ai lam chye lu ai.
KIO Ginjaw Hpaji Dap kaw na, mung masa hpyen masa ganing re mi shuk shanut taw nga ai raitim, ladat amyu myu hku na ramma ni a hpaji ladaw langai mi n machyi mat hkra, shakut taw nga ai re lam chye lu ai.
