KIO uphkang ginra kata na tsang shi awng san poi mahtai shapraw

Wunpawng Mungdan Shang Lawt Asuya, KIO uphkang ginra kata hpaw sharin nga ai lahta tsang jawng tsang shi awng sum hpe June shata praw 6 ya shani hta mahtai shapraw ya sai.

Dawn jan masat lu let, madang shang ai jawngma ni gaw, 1^st Laiza Lahta Tsang Jawng, 2^nd Mai Ja Yang Lahta Tsang Jawng, 3^rd Laiza Lahta Tsang Jawng, 4^th Mungmyit Sinli Lahta Tsang Jawng, 5^th Laiza Lahta Tsang Jawng, 6^th Alen Bum Jawng, 7^th Mai Ja Yang Lahta Tsang Jawng, 8^th Mai Ja Yang Lahta Tsang Jawng, 9^th Mungmyit Sinli Lahta Tsang Jawng, 10^th Mai Ja Yang Lahta Tsang Jawng hte 10^th Mai Ja Yang Lahta Tsang Jawng jawngma ni lu ai lam chye lu ai.

“Dai ning na jawngma ni tsang shi san poi shang na matu jahpan jaw ai gaw 2192 re, san poi bai san sa wa ai shaloi gaw marai 4 nhtai mat ai, htai ai yawng gaw 2188 htai ai hta na awng ai gaw 1680 awng ai hku re, marai 508 gaw hkrat ai hku re, dai majaw awng shadang gaw 76.78 tsa hta shadang dai hte awng ai ga rai sai” nga nna Ginjaw Hpaji Dap Amu Madu Sara Kaba Marip Naw Htoi tsun ai.

Ginjaw Hpaji Dap kaw nna, madang shang ai, dawn jan masat lu ai jawngma yawng 521 hte dawn jan masat lu hkra sharin ya ai sara saranu ni hpe masat masa kumhpa shagrau jaw na lam Sara Kaba tsun ai.

Alen Bum Jawng kaw nna awng ai jawngma yawng marai 507, Chying Htawng Pa Jawng marai 18, Lawt Awng Jawng marai 24, Laiza Lahta Tsang Jawng marai 278, Mai Ja Yang Lahta Tsang Jawng marai 293, Mungmyit Sinli Lahta Tsang Jawng marai 242, Mungmyit Sinli kawng ran Mungbaw Jawng marai 38, Nba Pa Lahta Tsang Jawng marai 140, N-gum La Lahta Tsang Jawng marai 140 re lam chye lu ai.

2021-2022 hpaji ladaw KIO uphkang ginra na lahta tsang jawng ni gaw Alen Bum Jawng, Sadung Ginwang kata na sasana jawng rai nga ai Chying Htawng Pa Jawng, Lawt Awng Lahta Tsang Jawng, Laiza Lahta Tsang Jawng, Mai Ja Yang Lahta Tsang Jawng, Mungmyit Sinli Lahta Tsawng Jawng, Mungmyit Sinli kawng ran Mungbaw, Nba Pa Lahta Tsang Jawng hte N-gum La Lahta Tsang Jawng ni rai nga ai.