KIO uphkang ginra na COVID-19 ana zinli makawp ninghkap ai hte seng ai lam
KIO uphkang ginra hta December shata (15) ya shani hkamja lam masam maram hkam la nga ai masha ni gaw, Mung Lai Hkyet Quarantine Dabang kaw marai (40), Sinpraw Ginwang Ginjaw Mai Ja Yang Quarantine Dabang kaw marai (41), Manmaw Ginwang Quarantine Dabang kaw marai (19), Dingdung Ginwang Ginjaw Mungnya Zup Quarantine Dabang kaw marai (390), yawng marai (490) Quarantine hkam la nga ai lam, Quarantine Dabang lit nga ai salang ni kaw na chye lu ai.
COVID-19 ana zinli makawp ninghkap na matu Laiza Muklum hte Sinpraw Ginwang Ginjaw hta, October shata praw kaw nna pru shang hkawm sa hkawm wa ahkang hpe aten n masat pat hkum da ai lam nga ai rai nna, Sinpraw Ginwang Ginjaw hta December shata (13) ya shani kaw nna masat da ai check point lam hku nre ai sha kaga lam hku mayun mayoi shang wa ai kadai hpe raitim, Quarantine nhtoi (14) ya hta jat nna, nhtoi (21) ya Quarantine hkam la shangun nhtawm, Quarantine hkam la ngut ai hpang COVID-19 ana zinli makawp ninghkap komiti kaw nna ahkyak la ai lam galaw sa wa na re hpe chye lu ai.
Sadung Ginwang hta December shata (15) ya shani kaw nna December shata (30) ya shani du hkra lockdown nhtoi masat ai lam nga ai hte nhtoi masat ai lam hpe ana kap bra ai masa hta hkan nna galai shai ai lam nga na re hpe chye lu ai.
COVID-19 ana zinli kap bra ai lam law jat nga ding yang rai nga ai hte hkang zing lu ai lam garai nnga shi ai re majaw, COVID-19 ana zinli makawp ninghkap tara hpe hkum ding dek hkan nang hkan sa nna ding yang rai nga na matu Ginjaw COVID-19 ana zinli makawp ninghkap komiti kaw nna ndau da ai lam nga ai re hpe chye lu ai.
