KIO uphkang ginra ni hta Karate bai hpaw sharin sa wa na

Myusha Gintawng Wunpawng Karate hpe August shata 24 ya shani kaw nna Laiza, Je Yang IDPs, Mai Ja Yang Club ni bai hpaw sa wa na lam chye lu ai.

Sharin nhtoi hpe bat hpang 1 ya kaw na bat 5 ya lapran, aten jahpawt hkying 6:00am hte hkying 8:00am lapran hta sharin sa wa na re lam chye lu ai.

Ya na zawn Karate Club bai hpaw ai lam hpe Ginjaw Covid-19 Ana Zinli Makawp Ninghkap Komiti kawn ahkang jaw ai rai nna, Karate ginsup ai ni hkan sa ra na tara ni hpe mung, jahkrat da ai lam, ndau laika kaw na chye lu ai.

Ginsup ai ni hkan sa ra na tara ni gaw, n-gup magap (Masks) shakap sa ra na, hkum kahtet shadawn ai hpe hkam la ra na, Club kata nshang shi yang lata kashin ra na, tinggyeng lu hka la sa ra na, langai hte langai masat da ai shara hta sha ginsup ra na hte Club kata majoi hpawng chyawm ai lam n galaw lu na  lam chye lu ai.

COVID-19 ladaw laman Karate ginsup ai ni gaw Ginjaw Covid-19 Ana Zinli Makawp Ninghkap Komiti kaw nna masat jahkrat da ai tarawng tara ni hte Club a tara ni hpe mung tup hkrak hkan sa shatup ra na lam chye lu ai.

Photo Credit; Amyu Sha Gintawng Jinghpaw Wunpawng Karate