Kokang MNDAA hpyen hpung ni hpyen lahkawn ai hta mungmasha marai 1 hpe gap sat, langai hkala

Mungmyit Sinli Ga (Kachin Sub-State), ), Mungji Ginwang, Tamungne Ginwang Daw, KIA Masat (10) Dap Ba, Masat (2) Dap Dung ginra, Tamungne Befajai mare kaw August shata 30 ya shana hta MNDAA hpyen hpung ni hpyen sa lahkawn ai hta mungmasha marai 1 hpe gap sat, langai hkala hkrum ai lam, ginra masha ni kaw na chye lu ai.

Gap sat hkrum ai wa gaw, Salang Lahpawk Zawng Dau Asak (21) ning, kasha langai a kawa rai nna, hkala hkrum ai wa gaw si mat ai wa na kahpu Shadang Lahpawk Zawng Hkawng re hte lata kaw pala hkala hkrum ai lam chye lu ai.

Ndai mabyin hte seng nna, ginra masha ni tsun ai hta “Kokang hpyen la ni gaw hpyen la lahkawn na matu, Salang Lahpawk Zawng Dau yan nu wa ni a, dum nta kaw chyinghka hpaw mu ngu sa akawk ai hta nta masha ni gaw lagut damya shadu nna, kadai ni re dumhpau sinat nga ai re lu ngu san jahtau let, chyinghka hpaw dat ai hte Kokang hpyen la wa sinat gap dumbre dat ai majaw, Salang Lahpawk Zawng Dau gaw dai shara kaw nan si sum mat nna, kahpu Shd. Zawng Hkawng gaw lata kaw hkala hkra nhtawm, ya aten Tamungne tsi rung kaw tsi tsi hkam la nga ai” nga nna ginra masha ni tsun ai re.

Lai wa sai April shata hta mung, Manje mare kaw nanghpam lu sha ai mungmasha langai hpe MNDAA hpyen la ni adup zing-ri sat kau ai mabyin byin sai sha n-ga, ndai August shata praw hta sha, Gangming Loidau maga na mungmasha langai nanghpam lu sha ai ga baw hte adup abyen sat ai mabyin ni nga lai wa sai re lam, ginra masha ni tsun ai kaw na chye lu ai.

Dai gumshem Myen hpyen dap sha, mungshawa ni hpe sinat laknak hpai nna, kam ai hku gap sat zing-ri sat nga ai ngu yang, laknak lang rawt malan wuhpung nkau mi mung, ndai zawn mungshawa a ntsa zai mazut ai lailen gaw n-galaw ging ai ngu mu mada ai. Anhte mungchying mungshawa ni gaw, kadai hpe kamhpa ai baw re pyi n chye mat saga ai nga nna, Mungmyit Sinli Ga na salang langai tsun ai re.