Kokang MNDAA hte Myen hpyen hpung ni gasat gala majan byin

Mungmyit Sinli Ga (Kachin Sub-state) KIA Masat  10 Dap Ba, Masat 17 Dap Dung  ginra, Bang Ya Yung Bum hte Nam Tuk lapran kaw April shata praw 7 ya jahpawt hkying 8:50pm aten hta MNDAA hte Myen hpyen hpung  ni gasat gala majan byin ai lam chye lu ai.

MNDAA ni shara gawan hkawm ai kaw jahkring mi gap hkat ai. Dai hpang Myen hpyen hpung ni gaw, MNDAA hpyen hpung ni nga ai shara de sinat kaba gap bun nna htu shadut lung wa ai lam, shawng lam na salang langai shana wa ai.

Ya aten hta Myen hpyen hpung ni gaw, KIA ni nga ai shara hte kade ntsan ai kaw du nga sai majaw, Myen hpyen ni matut nna nyi kahtep wa ai rai yang, gasat poi byin wa mai ai lam, salang wa matut tsun ai.

Myen Hpyen Dap ni April shata praw 6 ya shani hta mung, KIA Masat 17 Dap Dung ginra hta hpyen n-gun 200 jan bai jat da ai lam nga ai rai nna, hpyen manam n-gun yawng 700 jan du nga sai lam, ginra hpyen shi shawk ni kawn chye lu ai.

KIA Masat 17 Dap Dung ginra hta lai wa sai March shata 26 ya shani kaw nna, Kokang MNDAA hpyen hpung ni hte Myen hpyen hpung ni numdaw mi bai gasat gala majan byin wa ai re.