Kokang (MNDAA) ni mungshawa marai 6 hpe gap sat, marai 6 hkala
Mungmyit Sinli Ga (Kachin Sub-tate) ginra Mungji Ginwang, Ja Yang Ginwangdaw Pying Hkan mare makau kaw, Kokang ni mungshawa marai 6 hpe gap sat kau nna, marai 6 hkala hkrum ai lam chye lu ai.
March shata praw 5 ya shani hkying 12:00pm aten daram hta Pying Hkan mare lahta Chying Tau Pa, Nam Nin hka kaw ja htu ai Kokang (MNDAA) ni hpe ja nhtu na matu mungshawa ni sa tsun ninghkap ai hta Kokang ni mungshawa marai 6 hpe gap sat kau nna, marai 6 hkala hkrum ai lam, ginra masha ni tsun ai.
March shata praw 4 ya shani, ja htu nga ai Kokang ni hpe nhtu na matu Mungji ginra nga ai mungshawa ni wa tsun jahkrup bawngban ai, dai shani jahkrup bawngban la lu sai raitim, praw 5 ya jahpawt bai wa htu hpang wa ai majaw, mungshawa ni kalang bai wa tsun ninghkap ai kaw ga shawng shai hkat nna, Kokang ni si nat hte gap dum bre bun ai majaw, mungshawa marai 6 asak si sum mat nna, marai 6 hkala hkrum ai lam chye lu ai.
Asak si sum mat ai mungshawa ni gaw, Shd. Maran Zau Doi asak (35), Slg. Lamung Naw Ja asak (41), Slg. Lamung Naw Naw asak (33), Slg. Lagat Naw Ra asak (39), Slg. Lashi Awng San asak (40) hte Slg. Lagwi Ting Chang asak ( 35) ni rai nna, hkala hkrum ai ni gaw, Slg. Hpaumyang Gam Shawng, Slg. Pyingma Naw Ja, Slg. Maran Hkun Lun, Slg. Zau Hpau Naw, Shd. Lagat Seng Nan hte Shd. Na Bang Gam Awng ni re ai lam chye lu ai.
Asak si sum mat ai ni a moi mang hpe March shata praw 7 ya shani makoi mayang na rai nna, hkala hkrum ai mungshawa ni mung ya aten, Kutkai tsi rung kaw tsi tsi hkamla nga ai lam chye lu ai.
Ndai mabyin hte seng ai manghkang hpe gara hku hparan sa wa na nchye lu shi ai sha n-ga, dai ginra na mungshawa ni mung, Kokang (MNDAA) ni hpe nra sharawng ai lam, shawa n-gun madun ai lam ni galaw ai rai nna, Nam Nin Hka gaw Mungji grup yin nga ai mungshawa ni dai hka hpe machyu let, hkauna galaw lu galaw sha nga ai re hpe mung chye lu ai.
