Kokang MNDAA, TNLA ni hte Myen Hpyen Dap ni gasat gala majan matut byin
Mungmyit Sinli Ga ( Kachin Sub-state ) KIA Dap Ba 10 Dap Dung 2 ginra hta shamu shamawt nga ai, Myen Hpyen Dapnu 99 kata na hpyen hpung ni hte Kokang MNDAA hpyen hpung ni August shata 13 ya jahpawt hkying 8 hte hkying 9 lapran aten hta Na Yi mare makau kaw gasat gala majan byin ai lam chye lu ai.
Myen hpyen ni gaw n gun 90 daram re. Tamunye maga kawn Mungji maga de shamu shamawt lung wa ai majaw, Na Yi mare makau kaw hkap gap ai, Myen ni gaw hpang lam de bai nhtang yu wa yang Shai Je Pa mare ( Sha Zigu Jai ) hta dai na de hkying 3 hte hkying 4 lapran kaw bai hkap gap ai re lam, shawng lam na Salang langai shana wa ai.
Gasat gala majan byin ai hta Myen hpyen dap maga de si hkala nga ai raitim marai kade re hpe gaw tuk hkrak n chye lu ai. Tamunye kaw nga ai Myen hpyen dap ni mung majan byin ai maga de 105mm ngu maram lu ai sinat kaba 3 lang gap bun ai lam, Salang wa tsun ai kawn chye lu ai.
TNLA hpyen hpung hte Myen Dapnu 99 kata na Hk.M.Y 109 dap na hpyen hpung ni mung, dai hpawt hkying 10:00am jan aten hta Tamunye kawn Kuthkai yu wa lam Mawhan mare makau kaw gasat gala byin ai lam, buga masha ni kawn chye lu ai.
August shata 12 ya shani hta MNDAA, TNLA hte AA ni ndau laika shapraw ai hta gasat gala majan laja lana byin wa na hpe tsang ai lam, hpu nau daphpawm 3 shamu shamawt ai Myen Mung a dingdung daw hte Rakhine ginra hta Myen hpyen dap kaw nna htim gasat ai lam hpe lawan jahkring kau na lam, byin nga ai majan hpe n jahkring ai sha matut nna hpyen shamu shamawt ai lam galaw ai rai yang byin pru wa ai manghkang yawng gaw Myen hpyen dap a lit sha rai na re lam ni ndau laika shapraw ai hta tsun da ai.
