Korea jawng lung, Jinghpaw jawngma ni Gwihka sharut gyi hkala hkrum masha ni hpe garum

Jinghpaw Wunpawng Chyum Dakkasu (KTCS) hta Korea ga sharin la nna, Vision University, Korea kaw hpaji sharin nga ai Jinghpaw jawngma ni kaw nna, lai wa sai shata Hpakant Gwihka mare lungseng nhkun sharut gyi nna, yawn hkyen hkala nba hkrum ai hkristan hpung masha ni hpe ja gumhpraw garum jaw ai lam chye lu ai.

Ya na zawn ja gumhpraw garum jaw ai lam hte seng nna, Uru Sengmaw Ginwang Amu Madu Rev. Saulang Hkaw Bawm tsun ai hta, “Ndai gumhpraw hpe KTCS kaw nna anhte Uru Sengmaw Ginwang de shagun ya let, anhte gaw gawng malai hku nna shalai ya ai lam re. Gwihka hta byin ai mabyin hta anhte hpung masha ni marai 16 asak si sum mat ai majaw shanhte Korea kaw jawng lung nga ai jawngma ni jawm gahkyin nna garum jaw ai lam re” nga nna tsun ai.

KTCS kaw nna shagun dat ai garum gumhpraw kyats 5,032,000 hpe August shata 14 ya shani hkap la lu sai lam, ndai gumhpraw hpe ndai laman garum jaw sa wa na re lam sara matut tsun ai.

Garum gumhpraw ni hpe Gwihka sharut gyi ai kaw asak si sum ai ni hpe garum jaw ai re sha n ga, kaga maw ni hta hkala nba asak si sum ai nta masha ni hpe matut tam sagawn let, garum jaw na re lam chye lu ai.

Ya na zawn garum jaw ai lam hta Vision University Korea jawng up sara kaba Professor Hong Sung Jin hte sara nkau ni mung shang lawm garum ai lam chye lu ai.

Photo Credit; KTCS Nawng Nang