KSCU dakkasu jawng yu hpawng galaw
Ginjaw Ginra hta hpaw da ai, KSCU (Kachin State Comprehensive University) dakkasu jawng a (4) lang na jawng yu lakmat shagrau hpawng lamang hpe February shata 14 ya shani, Laiza kaw galaw la lu sai lam chye lu ai.
Jawng yu hpawng hta KIC Ningbaw Malai Du Kaba Sumlut Gun Maw kaw nna, jawng yu lakmat shagrau hkamla sai jawngma ni hpe shatsam mungga jaw ai lam galaw ai re.
Daini na jawng yu hpawng hta jawng yu lakmak shagrau hkamla sai jawngma yawng marai 128 rai nna, jawngma kanu kawa ni hte saw shaga da ai myit su du salang ni yawng, marai 700 jan sa du shang lawm ai hte galaw la lu sai lam chye lu ai.
KSCU dakkasu jawng hpe laiwa sai 2022 ning May shata 30 ya shani hpaw hpang wa ai rai nna, School of Medical Sciences, School of Nursing Sciences, School of Technology, School of Economics, School of Agriculture hte School of Arts and Sciences ginhpan ni hpe sharin ya nga ai re lam chye lu ai.
