KSPP Ginjaw Ramma Komiti kawn woi awn nna Mung masa ningmu jahpaw sharin hpawng galaw na
Hpakat Ginwang, KSPP Ginjaw Ramma Komiti kawn woi awn nna, Hpakant ginwang kata, nawku hpung shagu na ramma ni a matu Mung masa ningmu jahpaw ai sharin hpawng hpe Hpakant Muklum, Nga Pyaw Taw Hkalup Hpung Nawku jawng kaw September shata praw 7 ya shani galaw na re lam chye lu ai.
Sharin hpawng galaw ai a Yaw shada lam hpe KSPP Ginjaw Ramma lit hkam, Ramma Ningbaw Sara Jan Hkung ya na zawn tsun ai. “Daini Anhte ramma ni, mung masa lam hta grau nna kung kyang wa ai hte maren hpa lam hta mung hkrit myit nrawng ai sha dai ni na anhte ni a ra nga ai ahkaw ahkang ni hpe mung masa pin ra hku nna atsawm sha rai, lu gasat awng dang la na matu, mungmasa hte hpa lam hta mung, tara upadi ni hpe chye na, mung masa ni hpe mung chye na nna tinang a lu ging lu ang ai ahkaw ahkang ni hpe chye na wa nna ramma ni grau nna su hprang wa na matu yaw shada ai re” nga nna tsun ai.
KSPP Party Ningbaw Dr. Manam Tu Ja hku nna mung “Ningmu jahpaw machye machyang jaw ai hpe grai galaw ra ai, ya anhte lata ai party lam yan gaw jaw sai re majaw yawng dai kaw myit kap wa sai, raitim hkam la ai lam grau ngang kang na matu, mung masa myi jahpaw ya ra ai, mung masa myi hpaw yang she hkam la ai lam ni grau ngang kang wa na re majaw rau ai ten hta rau ai hku nna mung masa wun jat jaw ai hpawng ni law law galaw ya ra ai hku re. Dai gaw anhte KSPP party a policy langai re” nga nna tsun ai.
Sharin hpawng hta Federal hte seng ai lam hpe Sara Labya Jaw San Naw hku nna sharin ya na, Ramma hte prat ban ( ျမိဳ ့ျပနိုင္ငံေရးနွင့္လူငယ္ ) hte seng ai lam hpe Saranum Sut Seng Htoi hku nna sharin ya na re hte လူငယ္နွင့္ေခတ္သစ္ Philosophy hte seng ai lam hpe Sara Jan Hkawng hku nna sharin ya na re lam chye lu ai.
Mung masa ningmu jahpaw sharin hpawng hta Hpakant Ginwang kata, Nawku hpung shagu na ramma ni yawng marai 500 jan sa du sharin hkam la na re hte Hpakant, Uru Seng Maw Ginwang hta shawng nnan galaw hpang wa ai rai nna, Ginwang shagu matut nna galaw sa wa na masing nga ai lam chye lu ai.
