KSPP Youth kaw nna ra lata poi padang dip online zoom meeting galaw na
Kachin State People Party (KSPP) youth kaw nna 2020 ra lata poi hta shang lawm mat wa sai mungshawa ni hte bawngban sanglang ai lamang, ramma shada n gun awai hkrumzup bawngban ai lamang hpe December shata 13 ya shana hkying 7:00pm aten kaw nna hkying 8:30pm aten laman galaw sa wa na re lam chye lu ai.
“Madung gaw ramma ni ndai hku sha, lai di nga gaw nmai sai. Du wa na shaning hta mung ramma ni kaw nna ningbaw ningla kaja ni le wa hkra ngu ai yaw shada lam hte ramma ni hpe zinlum ai, ramma ni hte bawng ban ai, anhte a shawng lam hta gara hku myit shingran ai, ramma ni a myit mada lam ni hpe arau jawm galaw sa wa na matu, mungshawa ni a nsen, ramma ni a kraw madai hkam sha lam ni hpe anhte arau sha jasat jasa wa lu na matu ngu yaw shada ai” nga nna KSPP Youth Amu Madu Shayi Maji Seng Nu Pan tsun ai.
Hkrumzup bawngban hpawng hpe online zoom meeting ladat hte galaw na rai nhtawm, myit lawm ai mungshawa ramma ni kadai raitim mung zoom meeting ID: 83603900675, passcode:1234 hta matut mahkai shang lawm mai ai re.
Zoom meeting hta woi awn bawngban na ni gaw, Shayi Maji Seng Nu Pan (Ginjaw Ramma Committee Amu Madu) kaw nna woi awn bawng ban ai hte Shayi Nmawhka Ja Hkawng (Ginjaw Ramma Committee Jahpan Jum), Shayi Dumhpau Seng Lu Ing (Myitkyina Muklum Ramma Committee Amu Madu Kaba), Shadang Nawt Hkang Mung Htoi Tu (Shatapru Buga Ramma Committee Ningbaw) hte Shadang Magawng Tang Gun (Shatapru Buga Ramma Commmittee Amu Madu Kaba) ni kaw nna woi bawngban na rai nna, 2020 ning November shata praw 8 ya shani hta galaw lai wa ai ra lata poi padang dip hkrun lam hta shang lawm ap nawng lai wa sai ramma ni hte bawngban na re lam KSPP kaw na chye lu ai.
Ndai zoom meeting bawngban ai lamang hpe KSPP Youth & Maji Seng Nu Pan facebook page hta public live hku nna mung shapoi ya na re majaw mungshawa ni kadai raitim, ga san san ai hte mai shang lawm ai lam chye lu ai.
