KSPP Youth ni kaw nna fund tam ai gam chyam lamang galaw na
Kachin State People’s Party (KSPP) Myitkyina Ginwang Komiti ni woi awn nna, KSPP Youth ni a fund tam ai gam chyam lamang hpe Myitkyina, Shatapru Manau Wang kaw February shata 29 ya shani galaw na re lam chye lu ai.
“Ramma ni a shamu shamawt ai lamang langai rai nna, ramma ni ndai zawn galaw ai marang e shada magyep kap wa lu na matu, KSPP Party gaw ramma ni n-gun ja ai lam mungshawa yawng hpe htawng madun dan mayu ai majaw hte KSPP party grau nna n-gun ja wa hkra galaw sa wa na lam hpe Message jaw mayu ai majaw ndai lamang galaw ai re” nga nna KSPP Youth Komiti Ningtau Amu Madu Saranum Seng Nu Pan tsun ai.
Lu wa ai ja gumhpraw ni hpe gaw Ramma Fellowship galaw ai lam, ramma hte seng nna wunkat jaw ai lam, Special talk, Debate ni galaw ai lam hta jai lang lu na matu rai nna, KSPP mare kahtawng ramma komiti hpaw na matu hte du wa na March shata hta Confrence kaba galaw na matu hkyen da ai lam nga ai re majaw, ndai lamang hta ramma ni shang lawm lu na matu, tsan ai kaw na nlu sa ai ramma ni hpe lam shabrai, nga shara, lu sha ni garum jaw ya lu na matu fund tam ai lamang re lam, Saranum Seng Nu Pan tsun ai.
Gam chyam ai lamang hta Modo, Cycle, lagaw leng, Hka gye sadek, TV hte Phone ni lawm ai rai nna, lak mat langai mi kyats 5000 (Hkying Manga) hku nna dut shabra ya nga ai rai nna, Mungdan ting kaw nga ai Ramma ni, mungshawa ni yawng n-gun jaw la mai ai lam, gamchyam mahtai hpe Facebook hku nna mung, live ndau ai lam ni galaw sa wa na re lam, KSPP Youth Komiti ni kaw na chye lu ai.
