KTCS Chyum Dakkasu sharin achyin ai lamang ni jahkring da ai lam ndau
Jinghpaw Wunpawng Chyum Dakkasu, KTCS (Nawng Nang) a 2020 ning April-May aten na sharin achyin ai lamang (programs) ni hpe jahkring da sai lam, April shata 27 ya shani hta KTCS kaw nna ndau laika shapraw da ai re.
Covid-19 ana zinli Myen Mungdan hta matut chyam bra nga sai rai nna, Mungdan Asuya kaw na lit nga ai ni kawn masha hpawng de ai lam n galaw na matu, April 30 du hkra masat da ai kaw na, May 15 du hkra bai htawt sit masat dat sai re majaw, Chyum Dakkasu a April- May, ginhtawng ten na sharin achyin lamang ni rai nga ai ECCD Diploma module, M.Min, Korean Language hte ginhtawng jawng (summer school) ni yawng hpe jahkring sai re.
Chyum Dakkasu a 2020 ning jawng lung shaning a jawng hpaw nhtoi gaw, May shata 23 ya shani rai nna, ndai jawng hpaw nhtoi htawt sit ra ai lam nga wa yang mung bai ndau shana na re lam, ndau laika kaw na chye lu ai.
