Kung Law jawng hta jawng gawk hte jawng lang arung arai yakhkak nga
Laiza Manmaw lam ntsa, Kung Law mare na jawngma ni jawng gawk hte jawng lang arung arai yakhkak nga ai lam chye lu ai.
Ya aten Kung Law mare hta KIO Asuya kaw nna, jawng hpaw sharin nga sai hta jawng gawk, jawngma ni a ka laika, hti laika buk hte kaga jawng lang arung arai ni yakhkak nga ai lam, jawng magam gun ni kaw na chye lu ai.
Laiwa sai ten gumshem Myen hpyen asuya kawn, hpaw tawn da ai laika sharin jawng hta masa lam amyu myu a majaw nlu sharin ai rai nna, ya aten mare kata na shawa shara, dum nta ni hta mai byin ai hku sharin nga ai re hpe chye lu ai.
Kung Law jawng hpe tsang (9) du hkra hpaw sharin nga ai hta Kung Law, Myo Tit mare hte kaga mare kahtawn hkan na jawngma ni, hpyen koi yen wa ai jawngma ni yawng marai 300 daram sharin hkamla nga sai re hpe chye lu ai.
Sharin sara hku nna, KIO Asuya Ginjaw Hpaji Dap sara/num, CDM sara/num ni hte mare kata hkan na tsang (10) awng da sai ramma ni yawng marai (17) hte sharin nga ai re hpe matut chye lu ai.
