Kuthkai Chyum jawng a (53) lang na jawng yu shagrau sha-a hpawng galaw
Jinghpaw Wunpawng Chyum Hkawlik, KTC Kuthkai a (53) lang na jawng yu shagrau sha-a hpawng lamang hpe March shata praw 7 ya jahpawt hkying 10:00am aten kaw nna shana daw hkying 2:00pm aten laman Kuthkai Chyum jawng wang kaw galaw ai lam chye lu ai.
Jawng yu ai jawngma ni gaw, Certificate In Theology (C.Th) awng pru ai marai 11, Licentiate In Theology (L.Th) awng pru ai marai 38, L.Th English awng pru ai marai 2, Bacherlar Of Theology (B.Th) awng pru ai marai 27, Bacherlar Of Ministry (B.Min) awng pru ai marai 11, Layman kaw na marai 1, Diploma In Church and Music (DIP CM) awng pru ai marai 13, Diploma In Agriculture And Livestock Program (DALP) hkai rem kaw na marai 2, Certificate In Argriculture And Livestock Program (CALP) kaw na marai 5 hte Certificate In English (CEL) kaw na marai 36, yawng marai 142 re lam chye lu ai.
Class shagu kaw na ningtawn ai jawngma ni hpe ningtawn kumhpa masat shagrau sha-a ai sha n-ga, laksan Award masat shagrau ai lam mung galaw ai hta Tawng Nu Award ngu ai music kumhpa hpe B.Th pang kaw na Shayi Sumlut Seng Nu Ja hte Music Diploma kaw na Shadang Yajawng Lum Dau yan hkam la lu ai. KBC kaw na shagrau ai Dr. Ola Hanson Award hpe B.Th pang kaw na Shayi Mahtu Htoi Lat hkam la lu ai rai nna, kasi kaja kumhpa hpe gaw L.Th pang kaw na Shayi Lahpai Ja Hpa Awng hkam la lu ai lam chye lu ai.
Ndai jawng yu hpawng hta magam gun ladaw 50 ning ja jubilee hpring marai 15, 40 ning lahta na magam gun marai 7 hte 25 ning gumhpraw jubilee hpring marai 26, Kuthkai Chyum jawng awng pru ai magam gun Sara/num ni, hpungtau ni yawng hpe masat masa kumhpa shagrau sha-a lam galaw ai.
Kuthkai Chyum Jawng hpe lai wa sai 1932 ning hta Manmaw kaw shawng hpaw hpang wa ai rai nna, 1934 ning hta Kuthkai de bai htawt sit kau ai, 1966 ning hta Nawng Nang de bai htawt wa nna Kuthkai Chyum Jawng hpe Sammung ni a lahta tsang Chyum Jawng hku bai tawn wa ai hpang, 1997 ning hpang daw de Ginwang Chyum Jawng madang kaw nna KTC Kuthkai madang hku bai tsap wa ai re lam, KTC Kuthkai Ningtau Jawng Up, sharin Sara, Saranum Kaba Lahpai Nang Seng tsun ai kaw na chye lu ai.
Rev. Dr. Marip La Rip kaw na “Hkristu A Lam Hta Hkawm Nga Ga” ga baw hte mungga htawn ai rai nna, Sara Marip Hawng Hkawng (Nampaka buga) kaw nna “Hkristu A Lam Hta Hkawm Nga Ga” ngu ai ga baw hte mungga htawn tsun ai re hte Saranum Lahkum Lahpai Ja Hpa (Namtau Buga) kaw nna “Ramma Hte Htunghking Matut Mahkai Lam” Saranum Sumlut Seng Nu Ja (Mandalay buga) kaw nna “The Role Of Firstborn Son In The Old Testament” ngu ai gabaw ni hte n gun jaw mungga htawn tsun ai, jawng yu hpawng hta buga kaw na saw shaga da ai myitsu Salang ni, jawngma kanu kawa ni, hpung magam gun Sara/num ni yawng marai 1000 daram sa du shagrau shang lawm ai lam chye lu ai.
