EEDY NEWS News and Development
Kutkai Ginwang, Jinghpaw Wunpawng Hkalup Hpung, Kutkai Buga Hpung kaw nna, April shata praw 8 ya shani Hkalup Hpung htinggaw shagu hpe N-gu hte Jum garum ai lam chye lu ai.
“Seng ang ai asuya uphkang rung kaw nna lusha seng, gat seng ni hpe pat mat wa sai re majaw, nkau mi gaw dai ni tam dai ni sha re ni nga ai, anhte nawku hpung kaw nna, hpung masha ni hpe myitdum nga ga ai ngu ai hpe chye shangun mayu ai hte Karai Kasang a zinlum ai lam myit n-gun lu la na matu galaw ai re.
Htinggaw langai hta N-gu bye lahkawng hte Jum joi mi garum ya ai, ndai kalang gaw shawng ningnan lang na ninggam rai nna, ndai hta grau nna yak wa ai masa nga jang lahkawng lang na ninggam hta gaw, kaja wa nan yak hkak ai ni hpe lata shaw la nhtawm garum ai lam hpe galaw na, madung gaw Hpung kaw na zinlum ai Karai Kasang a tsawra myit hpe hkapla lu na hpe yaw shatawng shada ai” nga nna Kutkai Buga Hpung Up Rev. Dr. Lahtaw Gum Se tsun ai.
Kutkai Buga hta shingnan hpung htinggaw hte rai yang 800 daram nga ai lam chye lu ai.
Kutkai buga hta covid-19 ana zinli a majaw, ginhtawng jawng hte nawku jawng hta hpawng ai lam hpe March shata jahtum bat kaw na jahkring da ai raitim, online hku nna nawku ku ai lam galaw nga ai re.
Kutkai Muklum hta kaga mungdan hkan na du wa ai masha ni hpe Myo Nay Hkamja Dap kaw nna, laika sharin jawng hte gat ningnan gap da ai shara ni hta nhtoi 14 ya quarantine galaw na matu, hkyen lajang da ai lam chye lu ai.
