Kutkai kaw Gaw Ningja hte seng ai “လူငယ္ဖြံ႕ျဖိဳးေရးႏွင့္ မသန္စြမ္းေဂဟာ” pyen dau shadun

Kutkai muklum, Galile jawng kaw September shata 27 ya shani hkying 11:00am aten hta NeT Organization kaw nna shangai shaprat ai “ေဂသေရႈမန္” kawn woi awn nhtawm Gaw Ningja hte seng ai “လူငယ္ဖြံ႕ျဖိဳးေရးႏွင့္ မသန္စြမ္းေဂဟာ” ngu ai pyen dau shadun kyu hpyi hpawng galaw la lu sai lam chye lu ai.

Gaw Ningja hpe 2019 ning February shata kaw nna hpaw hpang ai re. Ndai Gaw Ningja hpe ginra hku na nmasat ai, wuhpung langai mi hku nna sha dang di ai made galaw hpang sa wa ai rai nhtawm seng ang ai asuya ni kawn mu mada wa ai hte tara shang galaw na matu tsun shadut, masat masa galaw wa ai majaw, ya na zawn pyen dau shadun wa ai lam re.

Pyen dau shadun ai lamang hpe COVID_19 makawp maga ladat, ritkawp tara ni hte hkrak, hkan sa galaw ai rai nna Gaw Ningja jawngma, Sara/num ni, ginra masha ni hte hpung up/ hpung Sara ni yawng 60 daram shang lawm kyu hpyi la lu sai re.

Gaw Ningja hpaw ninghtan wa ai yaw shada lam gaw, Gaw ningja (nbyen nchyawn) ai ni, shinggyim wuhpung wuhpawng kata hta tinang lagaw tinang lu tsap wa na matu, laika chye hti chye ka lu na matu, tinang atsam tinang kam hpa lu wa na matu hte kan bau magam bungli chye galaw nna shang gumhpraw lu na matu yaw shada ai re lam, NeT Organization lit hkam Saranum Mai Mai tsun dan ai.

Ndai Mungmyit Sinli Ga hta gaw majan a majaw hpyen koi yen tsin yam hkrum nga ai Gaw Ningja ni a matu madung yaw shada let hpaw hpang wa ai rai nhtawm, amyu hte makam masham n ginhka ai, Gaw Ningja jawng ma yawng marai 32 nga ai re.

“Masha law malawng gaw Gaw ningja langai mi nga sai hte masha shajan langai hku kabai da ai zawn re ni anhte grai mu ai. Shanhte kaw mung atsam nga ai. Shinggyim masha langai a lu gring lu mai ai ahkaw ahkang ni hpe shanhte grau lu gring ai, dai hpe anhte malap mali ai lam grai nga ai re majaw shahte hpe shadan shadawng shangun mayu ai, dai re majaw shinggyim nauna myit hte shanhte lu mai ai ahkaw hkang ni hpe makawp maga la ga, nkabai da ai sha lakawn la ga” nga nna Saranum hpaji jaw tsun da ai.

Jawng ma ni hpe chye ging chye mai ai ta hpaji ni sharin ya ai, shawa wuhpung wuhpawng hte chye nga hkra shaman shakyang ya ai, makau grup yin ni kaw nna garan ginhka ai lam nnga na matu ningmu jahpaw ai lam ni galaw ya ai re hpe mung chye lu ai.