Kyokushin karate club hpaw sharin nga
Hpakant Ginwang Hpa Pyin, Maw Mung Htunghking Salang ni kawn woi awn nna, Kyokushin karate club hpe Hpa Pyin Htunghking Rung Gawknu kaw March shata 16 ya shani kaw nna hpaw sharin nga sai lam chye lu ai.
“Anhte Wunpawng kashu kasha ni nanghpam hta myit nlen mat na matu, myit masa tsaw wa na matu, hkamja zet let wa na matu hte myutsaw mungtsaw myit tsaw wa na matu yaw shada ai re” nga nna Hpa Pyin Kyokushin karate club Hpa-awn Hpungtau Nhpang Naw Tawng tsun ai.
Kyokushin karate sharin ya ai Sara ni marai 3 rai nna, sharin ladaw shata 3 re. Sharin ninghtoi gaw bat hpang 1 ya, 3 ya, 5 ya, jahpawt hkying 7:00am aten kaw nna hkying 8:30am aten laman sharin ya ai lam chye lu ai.
Mying bang form shabrai kyats 10,000 (Mun Mi), ginsup bu hpun palawng manu kyats 35,000 (Mun Masum Hkying Manga) hte ginsup ai shaloi lang ai arung arai ni hpe Hpa Pyin Htunghking rung kaw nna mari ya ai re lam chye lu ai.
Sharin shabrai marai langai shata mi kyats 20,000 (Mun Hkawng), sharin ladaw shata 3 rai yang kyaks 60,000 (Mun Kru) bang ra ai re.
Ya aten Hpa Pyin Kyokushin Karate Club hta sa du sharin hkam la nga ai ni gaw asak 8 ning a lahta na ma ni, ramma ni hte masha kaba ni num/la yawng marai 27 rai nna, karate hpe myit lawm nna sharin hkam la mayu ai ni yawng hpe hkapla nga ding yang re hpe mung chye lu ai.
