La Mai Yang post makau kaw gasat gala majan byin
Gahkyeng Bum Ginwang, KIA Masat (8) Dap Ba, Masat (5) Dap Dung hpyen hpung ni a La Mai Yang post makau kaw June shata 29 ya jahpawt hkying 10:30am aten daram hta KIA hte Myen hpyen hpung ni gasat gala majan byin ai lam na chye lu ai.
Myen Hpyen Dap, Hk.L.Y (237) hte Hk.M.Y (389) dap na pawng hpawm hpyen n gun 80 daram gaw, KIA ni shara jahkrat nga ai La Mai Yang post maga de htu shadut lung wa ai majaw, bawm hte hkap shingla gasat dat ai rai nna, matut nna mung majan naw byin wa mai ai lam, Masat (8) Dap Ba na lit nga ai Salang langai tsun dan ai.
Myen Hpyen Dap, Hk.M.Y (389) dap ni gaw, KIA Masat (5) Dap Dung ginra hta mi na shamu shamawt nga ai hpyen hpung ni re hpe mung chye lu ai.
KIA Masat (8) Dap Ba, Masat (5) Dap Dung ginra de, lai wa sai 2019 ning December shata hta mung, KIA hpyen hpyen hpung ni nga ai shara de, Myen hpyen hpung ni htu shadut lung wa ai majaw hkap shingla gasat ai lam chye lu ai.
