La shawa Chyum laika sharin hpawng hte gawdin shingjawng hpawng lamang hpe galaw la lu
Sama Ginwang Hkalup Hpung Ginjaw La hte Pat Jasan Komiti kaw nna lit la woi awn nhtawm, Sama Ginwang La shawa Chyum laika sharin hpawng hte gawdin (futsal) shingjawng hpawng lamang hpe September shata 22 ya shani kaw nna, Semtember shata 26 ya shani du hkra, Nawng E Hku Buga Hpung kaw galaw la lu sai lam chye lu ai.
Hpawng lamang a, yaw shada lam hpe Sama Ginwang Ginjaw Komiti Ningbaw, Sara Kaba Dingsi Tu San Awng kaw nna ya na zawn tsun ai.
“Ya aten hta anhte hpyen yen kaw na yawng ni mare buga de bai wa ai aten re, dai majaw anhte gaw shakut shaja ra ai, mungdan gawde ai lam hta mung, mare buga gawde ai lam hta mung, jawm shakut sa wa na matu, Hka Sung Ai De Sit Ga ngu ai gabaw hte hpawng lamang hpe galaw sa wa ai re” nga nna tsun ai.
Sharin sara ni gaw Rev. Zinghkang Gam Htun kaw nna, (Sut su ai kawa hte kunhting kaja), Saranum. Zinghtung Hkawn San kaw nna, (Nehemia laika) hpe sharin ya ai rai nna, laksak lakjet hku nna gaw, Salang Kaba Labang Doi Pyi Sa (Wunpawng Mungdan Shanglawt Hpung, Ningtau Ninggawn Amu Madu) kaw nna, Ninggawn Mungmasa Lam Yan hpe sa du sharin ya ai re lam chye lu ai.
Laksan lamang hku nna, buga shagu na Kawa La ni a, ka hkrang hte shingni ningja madun ai lam, laksan lakjet lamang ni, yu ngwi pinra lamang ni, gawdin (futsal) ginsup shingjawng lamang ni hpe galaw ai re.
Sharin hpawng lamang hta Sama Ginwang kata na buga hpung ni rai nga ai, Bansa Zi-un Buga, Mada Buga, Jaw Buga, Ga Ra Buga, Awng Ja Buga, Pungmwi Buga, Sut Hkawng Buga, Daga Buga, Katsu Buga, Dabak Buga, Ja Pu Buga, Salim Buga, Ja Hta Buga, Mali Tsanlun Buga, Sama Buga, Npawn Buga, Seng Mai Buga, Ban Sau Buga, Sut Ngai Buga, Rawt Jat Buga, Lahkra Yang Buga, Mai Sak Pa Buga, Nam San Buga, Nawng E Hku Buga hte Jan Mai Buga yawng buga (25) na kawa la ni marai 200 jan sa du shanglawm ai hte angwi apyaw galaw la lu sai lam chye lu ai.
