Lagat Kawng post hte Tang Gau Kyu Hpyi Bum hpe KIA ni bai zing la lu
Ginjaw Ginra makau, Nwan Yang makau Lagat Kawng kaw shara jahkrat nga ai Hk. L.Y (389) Myen dap ni hpe April shata 19 ya shani hkying 11:30am aten KIA Masat (3) Dap Dung hpyen hpung ni sa htim gap gasat ai shani hkying 12:00pm aten hta Lagat Kawng post hpe zing la lu ai lam na chye lu ai.
Jahpawt hkying 5:53am aten hta sha, KIA Masat (9) Dap Ba ginra, Dapnu (33) kata na Hk.L.Y (76) Myen hpyen hpun ni shara jahkrat nga ai Tang Gau Kyu Hpyi Bum hpe KIA Ba (9) hpyen hpung ni sa htim gap gasat ai, jahpawt hkying 6:40am aten Tang Gau Kyu Hpyi Bum hpe zing la lu sai lam, shawng lam na lit nga ai salang ni tsun ai.
Jahpawt hkying 9:30am aten hta mung, KIA Masat (8) Dap Ba ginra, Moe Nyin kawn pru wa ai Myen hpyen la htaw Mawdaw (1) hpe KIA Ba (8) hpyen hpung ni Nam Ma makau kaw bawm hkap dem bun ai kawn gasat gala majan ai.
April shata 19 ya shana maga hkying 3:00pm aten daram hta sha, Sadung kaw shara jahkrat nga ai Myen Balik dap ni hpe KIA Dung (3) hpyen hpung ni sa htim gap gasat ai rai nna, shani hkying 11:40am aten daram hta mung Hk.M.Y (385) dap na hpyen hpung ni hte KIA Dung (5) hpyen hpung ni Si Sak hte Pang Hkawn Yang lapran kaw gasat gala majan byin ai lam chye lu ai.
Myen Hpyen Dap kaw nna KIA ni nga ai ngu shadu ai shara ni hkan Myen hpyen nbungli, Jet Figther nbungli, Helicopter ni hte pyen gawoi nna bawm jahkrat gap gasat ai lam galaw nga ai re sha n-ga, sinat laknak kaba ni hte mung hkrup mara gap bun ai re lam chye lu ai.
